- २० श्रावण २०८३, बुधबार / Aug 5, 2026
काठमाडौं, ५ फागुन । पाकिस्तानको खैबर पख्तुनख्वा प्रान्तस्थित एक सैन्य चौकीमा भएको आत्मघाती विस्फोटमा कम्तीमा १० जना सुरक्षाकर्मीको मृत्यु भएको छ ।
बाजौर जिल्लाको मलंगी क्षेत्रमा विस्फोटक पदार्थले भरिएको गाडी चौकी रहेको भवनमा ठोक्किएर विस्फोट गराइएको थियो । उक्त भवन पहिले मदरसा रहेको भए पनि पछि त्यहाँ सुरक्षा चौकी स्थापना गरिएको थियो ।
प्रहरीका अनुसार विस्फोटमा एक प्रहरी र फ्रन्टियर कोरका नौ जना सैनिकको मृत्यु भएको छ । घटनापछि भग्नावशेषबाट शव निकाल्ने काम जारी रहेको छ ।
एक अधिकारीले बीबीसी उर्दूसँग कुरा गर्दै अज्ञात व्यक्तिहरूले विस्फोटकले भरिएको गाडी फ्रन्टियर कोरको चौकीमा ठोक्काएको बताएका छन् । घटनाको जिम्मेवारी कसैले लिएको छैन भने सुरक्षा निकायले अनुसन्धान सुरु गरेको जनाएको छ ।
