भर्खरै : Sorry, your browser does not support inline SVG.
नवदुर्गाको धार्मिक तथा सांस्कृतिक महत्व उजागर गर्न ‘अस्त्र टेम्पल क्वेस्ट २०८३’ | भक्तपुरको इतिहास र संघर्ष नयाँ पुस्तालाई बुझाउनुपर्छ : बिजुक्छेँ | यूएईमा भीषण सडक दुर्घटना : २३ गाडी ठोक्किँदा १४ जनाको मृत्यु, ३० घाइते | पर्वतीय क्षेत्र र जलवायु परिवर्तनका मुद्दालाई संस्थागत एजेन्डा बनाउन नेपालको आग्रह | माइक्रोबस दुर्घटनामा एउटै गाउँका १३ जनाको मृत्यु, चक्रघट्टामा शोकबिदा | आइतबारदेखि वर्षा र हिमपातको सम्भावना, खेतमै धान छ भने तत्काल भित्र्याउन आग्रह | प्रधानमन्त्रीको विशेष सुरक्षा सल्लाहकारमा कार्की नियुक्त, पत्र बुझ्न भने अस्वीकार | १० करोड खर्चेको कान्तिताल अलपत्र, लागुऔषध दुर्व्यसनीको अखडा बन्दै |

तेस्रोपटक जिब्रो छेड्दै सुजन बाग श्रेष्ठ, बोडेको जात्रालाई निरन्तरता

तेस्रोपटक जिब्रो छेड्दै सुजन बाग श्रेष्ठ, बोडेको जात्रालाई निरन्तरता

मध्यपुरथिमि, ३१ चैत । मध्यपुरथिमि नगरपालिका बोडेमा हरेक नयाँ वर्षको वैशाख २ गते मनाइने विश्वप्रसिद्ध ‘जिब्रो छेड्ने जात्रा’ यस वर्ष पनि निरन्तर रहने भएको छ। यस वर्ष स्थानीय २८ वर्षीय सुजन बाग श्रेष्ठले तेस्रोपटक जिब्रो छेडाएर यो सांस्कृतिक परम्परालाई जीवित राख्ने भएका छन् । 

सुजनका बुबा बुद्धकृष्ण बाग श्रेष्ठले नौँपटक जिब्रो छेडेर जात्रालाई निरन्तरता दिएका थिए। बुद्धकृष्णका ज्येष्ठ दाजु कृष्णचन्द्र बाग श्रेष्ठले १२ पटक जिब्रो छेडेका थिए। दुई वर्षअघि सुजनले यो परम्परालाई पुस्तान्तरण गर्दै जिब्रो छेडाएर नयाँ इतिहास रचेका थिए। जात्राका लागि तयारीमा कडा नियम पालना गर्नुपर्छ। बुद्धकृष्णका अनुसार, जिब्रो छेड्ने व्यक्तिले अशुद्ध व्यक्ति, महिला, जुठो वा सुतक परेका व्यक्तिलाई छुनुहुँदैन। नुन खान नहुने, बोडे छाडेर बाहिर जान नहुने र तीन दिनअघिदेखि व्रत बस्नुपर्ने परम्परा छ। सुजनले यो संस्कृति जोगाउन आफू प्रतिबद्ध रहेको बताए।

सुजन भन्छन्, “बुबाले जिब्रो छेड्दा सानैदेखि सँगै हुन्थेँ। उहाँको संस्कृति जोगाउने प्रयासले मलाई प्रेरणा दियो। दुई वर्षअघि मैले पहिलोपटक जिब्रो छेडेँ, यस वर्ष पनि महादीप बोकेर बोडे परिक्रमा गर्नेछु।” बुद्धकृष्णले थपे, “यो जात्रा बोडेको पहिचान हो। मेरो छोराले यो जिम्मेवारी सम्हालेकोमा गर्व लाग्छ। अब युवापुस्ताले यो परम्परा जोगाउनुपर्छ।”

जात्राअघि जिब्रो छेड्ने व्यक्तिले नाय पमाको घरमा चार दाम चढाएर सगुन दिने र व्रत सुरु गर्ने प्रचलन छ। जात्रा दिनमा पाँचो गणेश मन्दिर परिसरमा हजारौँ भक्तजनको उपस्थितिमा १० इन्च लामो फलामको सुइरो जिब्रोमा छेडिन्छ। त्यसपछि अर्धचन्द्राकार महादीप बोकेर बोडे सहर परिक्रमा गरिन्छ। अन्त्यमा, महालक्ष्मी मन्दिरमा सुइरो झिकेर घाउमा मन्दिरको माटो लगाउने परम्परा छ।

यो जात्रा १०८ वर्षदेखि निरन्तर चल्दै आएको छ, जसमा हालसम्म १३ जनाले जिब्रो छेडेका छन्।

 


Thali Mobile Pvt.Ltd.