- ३१ असार २०८३, बुधबार / Jul 15, 2026
एजेन्सी, ३१ चैत । सुडानको डार्फर क्षेत्रमा भोकमरीको सामना गरिरहेका विस्थापितहरूको शिविरमा भएको दुईदिने आक्रमणमा सयभन्दा बढीको ज्यान गएको छ।
र्यापिड सपोर्ट फोर्स (आरएसएफ) र सहयोगी मिलिशियाले गरेको आक्रमणमा २० बालबालिका र नौ राहतकर्मीको पनि मृत्यु भएको बीबीसीले जनाएको छ। संयुक्त राष्ट्रसंघका मानवीय संयोजक क्लेमेन्टाइन न्क्वेटा–सलामीले आरएसएफले शुक्रबारदेखि जामजाम र अबु शोरोक शिविर तथा नजिकैको अल–फशेर शहरमा आक्रमण गरेको बताएकी छन्।
अल–फशेर, उत्तरी डार्फरको राजधानी, हाल सुडानी सेनाको नियन्त्रणमा छ। सुडानी सेना दुई वर्षदेखि आरएसएफसँगको गृहयुद्धमा संलग्न छ, जसमा संयुक्त राष्ट्रसंघका अनुसार २४,००० भन्दा बढीको मृत्यु भइसकेको छ। तर, अभियन्ताहरूले वास्तविक संख्या योभन्दा धेरै हुन सक्ने अनुमान गरेका छन्।
आक्रमणमा जामजाम शिविरको एकमात्र सञ्चालित स्वास्थ्य केन्द्रमा कार्यरत नौ राहतकर्मी मारिए। रिलिफ इन्टरनेशनलका छ चिकित्साकर्मी शुक्रबार उक्त अस्पतालमा भएको आक्रमणमा मारिएका थिए। यी शिविरहरूमा ७,००,००० भन्दा बढी विस्थापितहरू बस्छन्, जो अहिले असुरक्षित अवस्थामा छन्।
आरएसएफले भने जामजाम शिविरमा आफ्नो संलग्नता अस्वीकार गर्दै सुडानी सेनाले यस्ता दृश्यहरू मञ्चन गरेको दाबी गरेको छ।
