- ३१ असार २०८३, बुधबार / Jul 15, 2026
जुम्ला, ३० चैत । हिमाली जिल्ला जुम्लामा नयाँ शैक्षिक सत्र सुरु हुनुअघि नै पाठ्यपुस्तक पुगेको छ । विगतका वर्षहरूमा ढिलाइ हुने गरेकोमा यस वर्ष समयमै पाठ्यपुस्तक उपलब्ध भएको हो ।
नेपालमा नयाँ शैक्षिक सत्र हरेक वर्ष वैशाख १ गतेदेखि सुरु हुन्छ । जुम्लामा केही वर्षअघिसम्म फागुनबाट शैक्षिक सत्र सुरु हुने गर्थ्यो, तर पछिल्ला दुई वर्षदेखि यहाँ पनि वैशाखबाटै सत्र सुरु हुँदै आएको छ ।
सदरमुकाम खलङ्गा बजारस्थित सन्ध्या स्टेशनरीका सञ्चालक सुमन खड्काले चैत १७ गतेदेखि नै नयाँ शैक्षिक सत्रका लागि पाठ्यपुस्तक जिल्लामा आइपुगेको जानकारी दिए । उनले भने, “कक्षा १ देखि ५ सम्मका पाठ्यपुस्तकको सेट रु. १,५०० र कक्षा ६ देखि १० सम्मका लागि रु. २,००० मा उपलब्ध छन् । हालसम्म जिल्लाका आठ विद्यालयले पाठ्यपुस्तक लिइसकेका छन्, र थप माग आइरहेको छ ।”
खड्काका अनुसार अहिले शिक्षकहरू आन्दोलनमा सहभागी भएकाले पाठ्यपुस्तकको बिक्री कम भएको छ, तर विद्यालयहरू खुलेपछि माग बढ्ने अपेक्षा छ । जुम्लामा पाठ्यपुस्तक वितरणको जिम्मेवारी सन्ध्या स्टेशनरी र जिपी स्टेशनरीले लिँदै आएका छन् ।
यस्तै, कनकासुन्दरीमा दर्पण स्टेशनरी, सिँजामा कर्णाली स्टेशनरी र तिलामा दीपकैलाश स्टेशनरीले पनि पाठ्यपुस्तक बिक्री–वितरण गरिरहेका छन् । शिक्षा विकास तथा समन्वय एकाइका अनुसार जिल्लाभर करिब १४५ सामुदायिक विद्यालय छन् ।
