- ३१ असार २०८३, बुधबार / Jul 15, 2026
कास्कीमा २ अस्थायी मतदान केन्द्र तोकिए
जिल्ला कारागार र जिसस परिसरमा केन्द्र
करिब २,९०० अस्थायी मतदाता
समानुपातिकतर्फ मात्र मतदान गर्न पाइने
निर्वाचनमा खटिने कर्मचारीले आफ्नै केन्द्रबाट मतदान गर्न पाउने
पोखरा, ५ फागुन । कास्कीमा फागुन २१ गते हुने प्रतिनिधिसभा निर्वाचनका लागि दुई वटा अस्थायी मतदान केन्द्र तोकिएका छन् । निर्वाचन आयोगको निर्देशनअनुसार कैदीबन्दी, निर्वाचनमा नखटिएका कर्मचारी तथा सुरक्षाकर्मीका लागि अस्थायी केन्द्र निर्धारण गरिएको हो ।
प्रदेश निर्वाचन कार्यालय कास्कीका प्रमुख नारायण ढकालका अनुसार जिल्ला कारागार कास्की र जिल्ला समन्वय समिति (जिसस) कास्कीमा अस्थायी मतदान केन्द्र राखिएको छ । कारागारमा रहेका कैदीबन्दीलाई मतदान अधिकार सुनिश्चित गर्न कारागारभित्रै केन्द्र स्थापना गरिएको हो । जिसस परिसरमा भने कर्मचारी र सुरक्षाकर्मीले मतदान गर्न सक्ने व्यवस्था मिलाइएको छ ।
कास्की जिल्लामा करिब २ हजार ९ सय जना अस्थायी मतदाता रहेको तथ्याङ्क छ । अस्थायी मतदाता नामावली स्वीकृत भइसकेको कार्यालयले जनाएको छ ।
ढकालका अनुसार जिल्ला कारागारमा रहेका कैदीबन्दीहरूको उपस्थिती उच्च रहने अनुमान गरिएको छ । तर जिसस कार्यालयस्थित अस्थायी केन्द्रमा भने तुलनात्मक रूपमा कम सहभागिता हुन सक्ने आँकलन गरिएको छ । निर्वाचनमा खटिने कर्मचारी र सुरक्षाकर्मीले आफू खटिएकै मतदान केन्द्रबाट मतदान गर्ने व्यवस्था गरिएकाले जिसस केन्द्रमा संख्या कम हुन सक्ने बताइएको छ ।
अस्थायी मतदान केन्द्रबाट मतदान गर्ने मतदाताले प्रतिनिधिसभाको समानुपातिक तर्फ मात्र मत हाल्न पाउनेछन् । प्रत्यक्षतर्फका उम्मेदवारलाई भने मत दिन नपाउने व्यवस्था रहेको निर्वाचन कार्यालयले स्पष्ट पारेको छ ।
