- २० जेष्ठ २०८३, बुधबार / Jun 3, 2026
काठमाडौँ, ५ माघ २०८२ । काठमाडौँ महानगरपालिका महानगर प्रहरी बलको प्रमुखमा एसपी विष्णुप्रसाद जोशी नियुक्त भएका छन् । यसअघिका प्रहरी प्रमुख एसएसपी राजुनाथ पाण्डेले राजीनामा दिएपछि वरिष्ठताको आधारमा जोशीले नगर प्रहरीको कमान्ड सम्हालेका हुन् ।
जोशीले यसअघि काठमाडौँ महानगरपालिकाको विपद् व्यवस्थापन प्रमुख र मध्ये क्षेत्र कमान्ड प्रमुखको जिम्मेवारी सम्हालिसकेका छन् । प्रमुख प्रशासकीय अधिकृत सरोज गुरागाँईले पाण्डेलाई निलम्बन गरेका बेला पनि जोशीले निमित्त प्रमुखको रूपमा काम गरिसकेका थिए ।
राजनीतिमा सक्रिय हुने घोषणा गर्दै महानगरका मेयर बालेन्द्र शाह (बालेन) सँगै एसएसपी पाण्डेले हिजोको मितिबाट लागू हुने गरी राजीनामा दिएका थिए । उनको राजीनामा स्वीकृत भएसँगै जोशीले आजबाट औपचारिक रूपमा महानगर प्रहरी प्रमुखको पदभार ग्रहण गरेका हुन् ।
पदभार सम्हाल्दै जोशीले नगर प्रहरीका सिनियर अधिकृतहरूसँग छलफल गर्दै आवश्यक निर्देशन दिएका छन् ।
