- २९ भाद्र २०८३, सोमबार / Sep 14, 2026
काठमाडौँ, ६ फागुन । पैदलयात्रुमाथि सडकमै हातपात गरेको आरोपमा एक कार चालकलाई प्रहरीले पक्राउ गरेको छ । सामाजिक सञ्जालमा घटना सम्बन्धी भिडियो भाइरल भएपछि प्रहरीले चालकको खोजी तीव्र बनाएको थियो ।
काठमाडौँ उपत्यका ट्राफिक प्रहरी प्रमुख प्रहरी वरिष्ठ उपरीक्षक नवराज अधिकारीका अनुसार बूढानीलकण्ठ नगरपालिका–३ बस्ने ४२ वर्षीय पारस बमलाई पक्राउ गरिएको हो । उनलाई थप अनुसन्धान तथा कारबाहीका लागि जिल्ला प्रहरी परिसर काठमाडौँलाई बुझाइएको छ ।
घटना काठमाडौँको नारायणगोपाल चोकमा भएको हो । गाडी रोकिएका बेला बा ३ च ११०३ नम्बरको निजी कारबाट ओर्लिएर चालकले सडकमा हिँडिरहेका एक पैदलयात्रुलाई हातपात तथा दुर्व्यवहार गरेको भिडियो सार्वजनिक भएको थियो ।
प्रहरीका अनुसार पक्राउ परेका बमलाई काठमाडौँ जिल्ला अदालतमा उपस्थित गराइएको थियो । अदालतले अनुसन्धानका लागि सात दिनको म्याद थप गरेको काठमाडौँ प्रहरीका प्रवक्ता पवनकुमार भट्टराईले जानकारी दिएका छन् ।
