- ११ बैशाख २०८३, शुक्रबार / Apr 24, 2026
काठमाडौं, ३ फागुन । हिन्दु धर्मावलम्बीहरूले आज महाशिवरात्रि पर्व देशभर श्रद्धा , भक्ति र उल्लासका साथ मनाइरहेका छन् । फागुन कृष्ण चतुर्दशीका दिन मनाइने यो पर्व भगवान् शिवको अत्यन्त प्रिय दिनका रूपमा मानिन्छ ।
धार्मिक ग्रन्थ शिवपुराण अनुसार शिवजी प्रकट भएको रातको स्मरणमा यो पर्व मनाइने विश्वास छ । यसलाई कालरात्रि , मोहरात्रि , सुखरात्रि र शिवरात्रि गरी चार प्रमुख पवित्र रात्रिमध्ये एक मानिन्छ । आज महाशिवरात्रिका अवसरमा पशुपतिनाथ मन्दिर परिसरमा भक्तजनको ठूलो भिड लागेको छ । बिहानैदेखि दर्शनका लागि लामबद्ध भएका श्रद्धालुहरूको संख्या बढ्दो छ ।
मन्दिर क्षेत्रमा साधुसन्तहरूको चहलपहल पनि उल्लेख्य देखिएको छ । साधु–बाबाहरूले धुनी बालेर ध्यान , जप तथा साधना गरिरहेका छन् भने दर्शनार्थीहरूले शिवको पूजा–आराधना गर्दै पर्व मनाइरहेका छन् ।
महाशिवरात्रिलाई विशेषगरी दुःखी र कष्टपूर्ण जीवन बिताइरहेका मानिसको मनमा धर्म र सकारात्मकता जागृत गराउने दिनका रूपमा लिने धार्मिक मान्यता रहेको छ ।
