- ११ बैशाख २०८३, शुक्रबार / Apr 24, 2026
काठमाडौं, ३ फागुन । निर्वाचन आयोग ले आगामी निर्वाचनलाई लक्षित गर्दै देशव्यापी विशेष मतदाता शिक्षा अभियान सुरु गरेको छ । फागुन ३ गतेदेखि सुरु भएको अभियान फागुन १७ गतेसम्म सञ्चालन हुने जनाइएको छ ।
आयोगका सूचना अधिकारी सुमन घिमिरे का अनुसार विगत निर्वाचनमा देखिएका कमजोरी सुधार गर्न यस पटक आयोग आफैंले नेतृत्व गर्दै कार्यक्रम सञ्चालन गरेको हो । अघिल्ला चुनावमा स्थानीय तहका कर्मचारी स्वयंसेवकका रूपमा परिचालित भए पनि यस पटक प्रत्येक वडामा आयोगले आफ्नै स्वयंसेवक नियुक्त गरी तालिम दिएर खटाएको छ ।
स्थानीय भाषा र परिवेश बुझ्ने स्वयंसेवकहरूले मतदातालाई सही मतदान विधिबारे जानकारी दिनेछन् । यस अभियानको मुख्य विशेषता ‘डिजिटल मतदाता शिक्षा’ हो । कागजको प्रयोग घटाउने उद्देश्यले पोस्टर र पम्प्लेटको सट्टा सामाजिक सञ्जाललाई प्राथमिकता दिइएको छ ।
आयोगको आधिकारिक Facebook पेजमार्फत उपलब्ध भिडियो , एनिमेसन र ब्रोसर देखाएर मतदातालाई जानकारी दिइनेछ । घरदैलो कार्यक्रमका क्रममा नमूना मतपत्र र स्वस्तिक छाप प्रयोग गर्ने सही तरिका पनि सिकाइने जनाइएको छ ।
अभियानको प्रभावकारिता मूल्यांकन गर्न प्रविधिमार्फत अनुगमन व्यवस्था गरिएको छ । स्थानीय तहका निर्वाचन सम्पर्क व्यक्तिलाई निगरानी जिम्मेवारी दिइएको छ भने केन्द्रबाट WhatsApp समूहमार्फत दैनिक रिपोर्टिङ भइरहेको छ ।
आयोगले मतदातालाई आफ्नो आधिकारिक सामाजिक सञ्जाल पेज फलो गरी डिजिटल माध्यमबाट निर्वाचनसम्बन्धी जानकारी लिन आग्रह गरेको छ ।
