- २० जेष्ठ २०८३, बुधबार / Jun 3, 2026
काठमाडौँ, १५ काघ । काठमाडौँको मूलपानी क्षेत्रमा प्रहरीले विशेष कारबाही गर्दै लुटेरा समूहका १० जनालाई पक्राउ गरेको छ। लुटेरालाई नियन्त्रणमा लिने क्रममा प्रहरीले गोली चलाएको जिल्ला प्रहरी परिसर काठमाडौँले जनाएको छ।
जिल्ला प्रहरी परिसर काठमाडौँका एसएसपी रमेश थापाका अनुसार कारबाहीका क्रममा लुटेरा समूहका एकजना नाइके गोली लागेर घाइते भएका छन्। उनलाई उपचारका लागि अस्पताल लगिएको छ। सोही क्रममा दुई जना प्रहरीसमेत घाइते भएका छन्, उनीहरूको अवस्था सामान्य रहेको प्रहरीले जनाएको छ।
पक्राउ परेका व्यक्तिहरूले काठमाडौँ उपत्यकाका विभिन्न स्थानमा रातिको समयमा सर्वसाधारणलाई पछ्याएर गहना, नगद तथा अन्य मूल्यवान् सामान लुटपाट गर्दै आतङ्क मच्चाउँदै आएको खुलेको छ। लगातार लुटपाटका घटनाहरू बढेपछि जिल्ला प्रहरी परिसर काठमाडौँको टोली गएराति परिचालन गरिएको थियो।
सूचनाका आधारमा मूलपानी क्षेत्रमा घेराबन्दी गरी लुटेरा समूहलाई नियन्त्रणमा लिने क्रममा गोली प्रहार गर्नु परेको प्रहरीले जनाएको छ।पक्राउ परेकाहरूको नाम हाल सार्वजनिक नगरिएको र घटनासम्बन्धी विस्तृत विवरण अनुसन्धानपछि सार्वजनिक गरिने जिल्ला प्रहरी परिसर काठमाडौँले जानकारी दिएको छ।
