- २१ श्रावण २०८३, बिहीबार / Aug 6, 2026
एजेन्सी । रुसी विपक्षी नेता एलेक्सी नाभाल्नी को मृत्यु प्रकरणमा दुर्लभ र प्रतिबन्धित विष प्रयोग गरिएको दाबी गरिएको छ । बेलायतसहितका युरोपेली देशहरूले संयुक्त विज्ञप्ति जारी गर्दै नाभाल्नीको शरीरमा दक्षिण अमेरिकी भ्यागुताबाट निकालिने ‘एपिटिबाडाइन’ नामक घातक विष भेटिएको उल्लेख गरेका छन् ।
उक्त विषले स्नायु प्रणालीमा सीधा आक्रमण गरी शरीरलाई पक्षघात बनाउने क्षमता राख्ने बताइएको छ । नाभाल्नी जेलमै रहेका बेला यस्तो विष प्रयोग भएको दाबी गर्दै पश्चिमा राष्ट्रहरूले यस घटनामा रुस सरकारको संलग्नता हुनसक्ने आरोप लगाएका छन् । तर रुसले भने आरोप अस्वीकार गर्दै नाभाल्नीको मृत्यु प्राकृतिक कारणले भएको जिकिर गरेको छ । यस प्रकरणपछि रुस र पश्चिमी राष्ट्रबीचको कूटनीतिक सम्बन्ध थप तनावपूर्ण बनेको विश्लेषण गरिएको छ ।
यसैबीच इरान सरकारको नीतिविरुद्ध विश्वका विभिन्न शहरमा इरानी नागरिकले प्रदर्शन गरेका छन् । ग्लोबल डे अफ एक्सन अन्तर्गत म्युनिख, लस एन्जलस र टोरन्टो लगायत स्थानमा र्याली निकाल्दै प्रदर्शनकारीहरूले शासन परिवर्तनको माग गरेका छन् । प्रदर्शनलाई लिएर संयुक्त राज्य अमेरिका र इरानबीच कडा आरोप–प्रत्यारोप सुरु भएको छ । अमेरिकाले इरानी नागरिकको लोकतान्त्रिक अधिकारको समर्थन गरेको जनाएको छ भने इरानले यी आन्दोलनलाई अमेरिकी तथा इजरायल समर्थित षड्यन्त्र भन्दै आन्तरिक मामिलामा हस्तक्षेप नगर्न चेतावनी दिएको छ ।
विश्लेषकहरूका अनुसार इरानभित्र बढ्दो महँगी , बेरोजगारी र नागरिक स्वतन्त्रतामाथि अंकुशका कारण आन्दोलन थप तीव्र बन्ने संकेत देखिएको छ ।
