पेट्रोलमा प्रतिलिटर १ रुपैयाँ वृद्धि

काठमाडौँ। नेपाल आयल निगमले पेट्रोलियम पदार्थको मूल्य वृद्धि गरेको छ। निगमका अनुसार आज राति १२ बजेदेखि लागू हुनेगरी पेट्रोल तथा डिजेल/मट्टितेलको मूल्य बढाइएको हो।

नयाँ समायोजनअनुसार पेट्रोलको मूल्य प्रतिलिटर १ रुपैयाँ र डिजेल/मट्टितेलको मूल्य प्रतिलिटर ३ रुपैयाँले वृद्धि गरिएको छ। मूल्यवृद्धिसँगै काठमाडौं, पोखरा र दिपायलमा पेट्रोलको मूल्य प्रतिलिटर १५६ रुपैयाँ कायम भएको छ। त्यस्तै सुर्खेत र दाङमा पेट्रोल १५५ रुपैयाँ पुगेको छ।

चारआली, विराटनगर, अमलेखगञ्ज, भलवारी, नेपालगञ्ज, धनगढी र वीरगञ्जमा भने पेट्रोलको मूल्य प्रतिलिटर १५३ रुपैयाँ ५० पैसा निर्धारण गरिएको निगमले जनाएको छ। निगमले अन्तर्राष्ट्रिय बजार मूल्य तथा ढुवानी लागतका आधारमा मूल्य समायोजन गरिएको जानकारी दिएको छ।