- ११ भाद्र २०८३, बिहीबार / Aug 27, 2026
रुपन्देही । राष्ट्रिय स्वतन्त्र पार्टीका अध्यक्ष रवि लामिछाने र पूर्व डिआइजी तथा गोर्खा मिडियाका तत्कालीन सञ्चालक छविलाल जोशीसँग सम्बन्धित बहुचर्चित सहकारी ठगी मुद्दामा आज पेसी चढाइएको छ ।
गत हप्तामात्र उच्च अदालत तुलसीपुर बुटवलको संयुक्त इजलास – न्यायाधीश वासुदेव आचार्य र ओमप्रकाश अर्यालले दुवै जनाको मुद्दाको मूल मिसिल झिकाउन आदेश दिएको थियो । सोही आदेशअनुसार मिसिल अदालतमा पुगेपछि आजको पेसी निश्चित भएको उच्च अदालत बुटवलका उपरजिष्टार यज्ञमूर्ति ज्ञवालीले जानकारी दिए । उनका अनुसार गोलाप्रथाबाट कुन इजलासमा बहस हुने हो, आजै टुंगो लाग्नेछ ।
बुटवलस्थित सुप्रिम सहकारी ठगीसम्बन्धी मुद्दामा पुर्पक्षका लागि थुनामा रहेका रवि लामिछानेले आफ्नो हिस्साको बिगो रकम दाखिला गरिसके पनि जिल्ला अदालत रुपन्देहीका न्यायाधीश नारायण सापकोटाको इजलासले साउन २६ गते उनलाई थुनामै राख्ने निर्णय गरेको थियो । जिल्ला अदालतको निर्णयविरुद्ध लामिछानेले भदौ ९ गते उच्च अदालतमा पुनरावेदन दर्ता गराएका थिए । यसअघि अदालतले लामिछाने र जोशी दुवैको मुद्दा एउटै साथ हेर्न आदेश गरिसकेको छ ।
आजको पेसीमा दुवै पक्षका कानुन व्यवसायीहरू उपस्थित भएर बहस गर्ने तयारीमा छन् । लामिछाने नख्खु कारागारमा छन् भने सह – अभियुक्त जोशी भैरहवामा थुनामा रहेका छन् ।
