- १० कार्तिक २०८३, मंगलवार / Oct 27, 2026
काठमाडौँ, ४ मंसिर । नेकपा एमालेकी नेतृ रामकुमारी झाँक्रीले सिमरामा भएको जेनजीसम्बन्धी घटनालाई अत्यन्तै दुःखद बताउँदै केही दृश्य–अदृश्य शक्तिहरू सरकार र राजनीतिक दलहरूलाई एकअर्कासँग भिडाउनु चाहन्छन् भन्ने आरोप लगाएकी छन् ।
सामाजिक सञ्जालमार्फत प्रतिक्रिया दिँदै उनले सिमरामा देखिएको तनाव कुनै साधारण घटना नभइ योजनाबद्ध उक्साहटको परिणाम हुनसक्ने उल्लेख गर्दै संविधानमाथि प्रहार गर्न खोज्ने समूह सक्रिय रहेको आरोप लगाइन् । झाँक्रीका अनुसार हजारौं नागरिकको बलिदान र त्यागपछि बनेको संविधानले नेपालीलाई स्वतन्त्र रुपमा हिँडडुल गर्ने, विचार रोज्ने, आफूले मन पराएको राजनीतिक दल वा धारमा संगठित हुने तथा शान्तिपूर्ण रुपमा सभा – जुलुस गर्ने अधिकार दिएको छ । “यी मौलिक हक सुरक्षित राख्नु सरकारको प्रमुख दायित्व हो,” उनले लेखेकी छन् ।
उनले सरकारको पहिलो जिम्मेवारी नागरिकको सुरक्षाको ग्यारेन्टी, शान्ति – सुरक्षा कायम गर्ने र सार्वजनिक तथा निजी सम्पत्तिको रक्षा गर्नु हो भन्ने स्मरण गराउँदै सिमरामा देखिएको अवस्था सही दिशामा नभएको टिप्पणी गरेकी छन् । “अब प्रतिशोध र बलप्रयोग होइन, संवादमार्फत समाधानतर्फ अग्रसर हुनुपर्छ,” उनले भनेकी छन्। झाँक्रीले देश, राष्ट्र र सार्वभौमिकताको सवालमा सबै देशभक्त एक पटक पुनः एकजुट हुनुपर्ने आवश्यकता औँल्याइन् ।
