- १८ श्रावण २०८३, सोमबार / Aug 3, 2026
चितवन, ०७ असार । राष्ट्रिय स्वतन्त्र पार्टी (रास्वपा) को रास्वपाको प्रथम महाधिवेशन आजदेखि चितवनको भरतपुरमा सुरु हुँदैछ । भरतपुरस्थित गेष्टहाउस चौरमा हुने महाधिवेशनको उद्घाटन पार्टी सभापति रवि लामिछाने र वरिष्ठ नेता बालेन्द्र शाहले गर्ने कार्यक्रम रहेको छ ।
रास्वपाको प्रथम महाधिवेशनमा देशभरबाट तीन हजार ९१८ प्रतिनिधि सहभागी हुने जनाइएको छ । जसमध्ये ३०० प्रतिनिधि मनोनयनमार्फत सहभागी हुनेछन् । महाधिवेशनका लागि देशभरका नेता, कार्यकर्ता तथा प्रतिनिधिहरू चितवनमा भेला भइसकेका छन् । पार्टीका अनुसार हालसम्म ६१० पालिकामा अधिवेशन सम्पन्न भइसकेको छ भने ४ हजार ६३ वडामा अधिवेशन गरिएको छ । त्यसैगरी ६ प्रदेश र ६४ जिल्लामा अधिवेशन सम्पन्न भई प्रतिनिधि छनोटको प्रक्रिया पूरा भएको छ । मधेश प्रदेश र निर्वाचन हुन बाँकी रहेका १३ जिल्लाबाट तदर्थ समितिमार्फत प्रतिनिधि सहभागी भएका छन् ।
पार्टी गठन भएको चार वर्षपछि पहिलो पटक हुन लागेको रास्वपाको प्रथम महाधिवेशन ले नयाँ नेतृत्व चयनसँगै संगठन सुदृढीकरण, भावी राजनीतिक रणनीति तथा नीतिगत विषयमा छलफल गर्नेछ । महाधिवेशनका लागि आवास, यातायात, सुरक्षा, स्वयंसेवक परिचालन तथा अन्य व्यवस्थापनका अधिकांश काम पूरा भइसकेको रास्वपाले जनाएको छ । पार्टीले महाधिवेशन व्यवस्थापनका लागि १८ वटा उपसमिति गठन गरेको थियो ।
महाधिवेशनअघि बसेको केन्द्रीय समितिको बैठकले पार्टी विधान संशोधन गर्ने निर्णयसमेत गरेको छ । संशोधित विधानअनुसार पार्टी संरचना पुनर्गठन गर्ने प्रस्ताव तयार गरिएको छ । महाधिवेशनमा राजनीतिक, आर्थिक, संगठनात्मक तथा विधानसम्बन्धी प्रतिवेदन प्रस्तुत गरिने जनाइएको छ ।
यसैबीच, चितवनमा रातभर परेको वर्षाका कारण महाधिवेशन स्थल जलमग्न भएको छ । चौरमा पानी जमेकाले कार्यक्रमअघि पानी निकाल्ने काम भइरहेको जनाइएको छ ।
रास्वपाले हाल पार्टी सदस्य संख्या पाँच लाख पुगेको दाबी गरेको छ ।पार्टी नेतृत्वले महाधिवेशनमार्फत संगठन विस्तार, जनसम्बन्ध सुदृढीकरण तथा आगामी राजनीतिक कार्यदिशा तय गर्ने लक्ष्य राखेको जनाएको छ ।
