- २६ असार २०८३, शुक्रबार / Jul 10, 2026
काठमाडौं,५ वैशाख । स्वास्थ्य तथा जनसंख्या मन्त्रालय ले सरकारी अस्पतालहरूमा हप्ताको दुई दिन बिदा लागू गर्ने निर्णय गरेको छ ।
मन्त्रालयले जारी गरेको विज्ञप्तिअनुसार अबदेखि शनिबार र आइतबार सार्वजनिक बिदा लागू हुनेछ । यस निर्णयसँगै बिदाका दिन अस्पतालहरूमा बहिरङ्ग (ओपिडी) सेवा बन्द रहनेछ ।
यद्यपि आकस्मिक तथा अत्यावश्यक स्वास्थ्य सेवा भने २४ घण्टा सञ्चालनमा रहने मन्त्रालयले स्पष्ट पारेको छ ।
हप्तामा दुई दिन बिदा लागू हुँदा स्वास्थ्य सेवामा पर्न सक्ने प्रभावलाई ध्यानमा राख्दै अस्पतालहरूलाई आवश्यक तयारी गर्न निर्देशन दिइएको छ । बिरामीलाई सेवा अभाव हुन नदिन आवश्यक परे नजिकका उपयुक्त अस्पतालमा रेफर गर्ने व्यवस्था मिलाउन पनि आग्रह गरिएको छ ।
यसका साथै एम्बुलेन्स सेवा तयारी अवस्थामा राख्न र उपलब्ध सेवासम्बन्धी जानकारी अस्पतालका वेबसाइट तथा सूचना प्रणालीमार्फत नियमित रूपमा अद्यावधिक गर्न मन्त्रालयले निर्देशन दिएको छ ।
