- २६ असार २०८३, शुक्रबार / Jul 10, 2026
काठमाडौं,५ वैशाख । नेपाल मेडिकल काउन्सिलले सामाजिक सञ्जालमार्फत औषधि र उपचारसम्बन्धी सल्लाह नदिन चिकित्सकहरूलाई निर्देशन दिएको छ ।
काउन्सिलले जारी गरेको सूचनामा फेसबुक, टिकटक, इन्स्टाग्रामजस्ता प्लेटफर्ममार्फत ‘अनलाइन परामर्श’को नाममा औषधि प्रयोग, उपचार विधि तथा स्वास्थ्यसम्बन्धी सामग्री सार्वजनिक गर्ने प्रवृत्ति बढेको भन्दै त्यसप्रति चिन्ता व्यक्त गरिएको छ ।
यस्ता सामग्रीका कारण बिरामीले चिकित्सकको प्रत्यक्ष परामर्श बिना नै औषधि सेवन गर्ने, गलत उपचार अपनाउने तथा स्वास्थ्यमा गम्भीर जोखिम उत्पन्न हुने सम्भावना रहने काउन्सिलको भनाइ छ ।
काउन्सिलले चिकित्सक तथा स्वास्थ्यकर्मीलाई सामाजिक सञ्जाल प्रयोग गर्दा विशेष सावधानी अपनाउन र पेशागत आचारसंहिताअनुसार काम गर्न निर्देशन दिएको छ । स्वास्थ्यसम्बन्धी सूचना वैज्ञानिक आधार र प्रमाणित तथ्यमा आधारित हुनुपर्ने तथा उपचारसम्बन्धी निर्णय प्रत्यक्ष परीक्षणपछि मात्र गर्नुपर्ने स्पष्ट पारिएको छ ।
निर्देशन उल्लङ्घन गरेमा सम्बन्धित चिकित्सक वा स्वास्थ्यकर्मीमाथि प्रचलित कानुनअनुसार कारबाही गरिने चेतावनीसमेत काउन्सिलले दिएको छ ।
