सिरहामा हावाहुरीको कहर: घरको पर्खाल भत्किँदा ६० वर्षीया महिलाको मृत्यु

सिरहा, ६ वैशाख । सिरहा जिल्लाको सखुवानान्कारकट्टी गाउँपालिका–२ मकरामपुरमा हावाहुरी र वर्षाका कारण घरको पर्खाल भत्किँदा एक महिलाको मृत्यु भएको छ ।

शनिबार राति करिब ८:४५ बजे आएको तीव्र हावाहुरीका कारण घरको पर्खाल खस्दा पुरिएर करिब ६० वर्षीया किसुनवती यादवको ज्यान गएको प्रहरीले जनाएको छ । जिल्ला प्रहरी कार्यालय सिरहा का प्रवक्ता एवं डीएसपी रमेशबहादुर पाल का अनुसार घटनाबारे जानकारी पाएलगत्तै इलाका प्रहरी कार्यालय महेशवारी को टोली घटनास्थल पुगेर आवश्यक विवरण संकलन गरेको थियो ।

प्रहरीका अनुसार मृतकको शव घरमै राखिएको छ भने घटनास्थल सुरक्षित गरिएको छ । उक्त स्थान इलाका प्रहरी कार्यालय महेशवारीबाट करिब ४.५ किलोमिटर पश्चिमतर्फ पर्दछ ।