- ३१ बैशाख २०८३, बिहीबार / May 14, 2026
काठमाडौँ, २४ पुष । अमेरिकाले ३१ वटा संयुक्त राष्ट्रसंघसँग सम्बन्धित निकायसहित ३५ वटा अन्तर्राष्ट्रिय गैर–सरकारी तथा अन्तर–सरकारी संस्थाबाट बाहिरिने निर्णय गरेको छ।
अमेरिकाका राष्ट्रपति डोनाल्ड ट्रम्पले बुधबार उक्त निर्णयसम्बन्धी कार्यकारी आदेशमा हस्ताक्षर गरेका हुन्। ह्वाइट हाउसद्वारा जारी वक्तव्यअनुसार ती संस्थाहरू ‘अमेरिकी राष्ट्रिय हितविपरीत सञ्चालन’ भइरहेको ठहर गर्दै अमेरिका ती निकायबाट अलग हुने निर्णयमा पुगेको हो।
ह्वाइट हाउसले ती निकायहरूले उग्र जलवायु नीति, विश्वव्यापी शासन प्रणाली (ग्लोबल गभर्नेन्स) र अमेरिकी सार्वभौमिकता तथा आर्थिक शक्तिसँग असंगत वैचारिक कार्यक्रमहरू अघि बढाउँदै आएको आरोप लगाएको छ।
यद्यपि, अमेरिका कुन–कुन संस्थाबाट बाहिरिँदै छ भन्ने विवरण भने सार्वजनिक गरिएको छैन। वक्तव्यमा उल्लेख भएअनुसार अमेरिकाले हाल सदस्यता लिएका वा पक्ष रहेका सबै अन्तर्राष्ट्रिय अन्तर–सरकारी संगठन, सम्मेलन तथा सन्धिहरूको समग्र समीक्षा गरेपछि यो निर्णय लिएको हो।
‘यी संस्थाहरूबाट बाहिरिँदा अमेरिकी करदाताको रकमबाट समर्थन हुँदै आएको विश्ववादी एजेन्डालाई रोक्न मद्दत पुग्नेछ,’ ह्वाइट हाउसले जनाएको छ। साथै, महत्त्वपूर्ण अन्तर्राष्ट्रिय विषयलाई अक्षम वा अहंकारी ढंगले सम्बोधन गर्ने निकायहरूमा जाने अमेरिकी करदाताको पैसा अब अन्य प्राथमिकतामा प्रयोग गर्न सकिने पनि वक्तव्यमा उल्लेख छ।
यस निर्णयले अमेरिकाको अन्तर्राष्ट्रिय कूटनीति र बहुपक्षीय संस्थाहरूसँगको सम्बन्धमा नयाँ बहस सिर्जना गर्ने अपेक्षा गरिएको छ।
