- २८ जेष्ठ २०८३, बिहीबार / Jun 11, 2026
काठमाडौं । कनेक्टियर बर्ड कल्सल्टेन्सी प्राइभेट लिमिटेडका सञ्चालक अजित तामाङ र सागर कुमाल फरार भएका छन् । सयौं मानिसलाई विभिन्न देश पठाउने भन्दै २ करोड ५८ लाख ठगी गरी उनीहरू फरार भएको आरोप छ ।
बेलबारी–३ मोरङ घर भई हाल काठमाडौं बस्ने अजित र शिवगन्ज–३ झापा घर भई हाल काठमाडौंमा बस्ने सागर कुमालविरुद्ध पक्राउ पुर्जी जारी भएको छ । वैदेशिक रोजगार विभागबाट गत चैत २९ गते उनीहरूलाई पक्राउ गरी अनुसन्धानमा सहयोग गर्नका लागि उपत्यका अपराध अनुसन्धान कार्यालयका नाममा पत्राचारसमेत गरेको छ ।
करोडौं रुपैयाँ ठगी गरी फरार रहेका उनीहरू हालसम्म पक्राउ परेका छैनन् । उपत्यका अपराध अनुसन्धान कार्यालयका सूचना अधिकारी रवीन्द्र रेग्मीले ठूलो समूहलाई ठगी गरी फरार उनीहरूको खोजी कार्य भइरहेको जानकारी दिए ।
अजित र सागरको म्यानेजरका रूपमा झापाकै कलादेवी सुवेदीले काम गर्थिन् । उनले नै विदेश जान आउने व्यक्तिहरूसँग कन्ट्याक गर्ने, सम्झौता गर्ने र पैसा बुझ्ने गर्थिन् । उनीविरुद्ध वैदेशिक रोजगार न्यायाधिकरण काठमाडौंमा मुद्दा चलिरहेको छ । हाल उनी पुर्पक्षका लागि थुनामा छन् । उनलाई ३ वर्ष कैद र ७० लाख धरौटी तोकेको छ।
