बाँकेमा ६ लाख भारतीय रुपैयाँसहित दुई जना पक्राउ

नेपालगन्ज, २६ बैशाख । बाँकेमा प्रहरीले स्रोत नखुलेको ६ लाख भारतीय रुपैयाँसहित दुई जनालाई पक्राउ गरेको छ ।

जिल्ला प्रहरी कार्यालय बाँकेका प्रहरी नायब उपरीक्षक दीपक पातलीका अनुसार नरैनापुर गाउँपालिकातर्फ जाँदै गरेका उनीहरूलाई विशेष सूचनाका आधारमा अटो रिक्सामा जाँच गरिएको थियो । जाँचका क्रममा अवैध भारतीय ५०० र १००० दरका नोट बरामद भएपछि प्रहरीले दुवै जनालाई नियन्त्रणमा लिएको हो ।

पक्राउ पर्नेमा नरैनापुर गाउँपालिका–५ का २९ वर्षीय वीरवल कुम्हार र नरैनापुर गाउँपालिका–४ का ३८ वर्षीय मुनिव खाँ रहेका छन् । उनीहरूलाई नेपालगन्ज उपमहानगरपालिका–२ स्थित एकलैनी क्षेत्रबाट पक्राउ गरिएको प्रहरीले जनाएको छ ।

बरामद गरिएको रकम आन्तरिक राजस्व कार्यालय, कोहलपुरमा बुझाइएको छ । पक्राउ परेका दुवै जनामाथि थप अनुसन्धान भइरहेको जिल्ला प्रहरी कार्यालय, बाँकेले जनाएको छ ।