भर्खरै : Sorry, your browser does not support inline SVG.
पोखरामा प्यारापाइलट उत्पादन गर्ने पहिलो स्कुल सञ्चालनमा, १ करोड ५० लाख लगानी | भक्तपुर नगरव्यापी विद्यालयस्तरीय खेलकुद प्रतियोगिता सुरु, ८४ विद्यालयका ३२ सयभन्दा बढी विद्यार्थी सहभागी | असोजमा महँगी ६.३७ प्रतिशत पुग्यो, घिउतेल र फलफूलको मूल्य सबैभन्दा धेरै बढ्यो | नक्कली शैक्षिक प्रमाणपत्र प्रयोग गरी बढुवा लिएको आरोपमा अनुसन्धान विभागका अधिकृतविरुद्ध मुद्दा | दुई महिनामा ८८७ व्यावसायिक फर्ममा अनुगमन, ७४ लाई कारबाही | असोजमा रेमिट्यान्सको ऐतिहासिक कीर्तिमान, एकै महिनामा भित्रियो २ खर्ब ६७ अर्ब | नेपाली सेनाको प्रवक्तामा सहायक रथी राजेन्द्र श्रेष्ठ नियुक्त | काठमाडौं विश्वकै तेस्रो प्रदूषित सहर, प्रदूषण नियन्त्रणको कार्ययोजना सार्वजनिक गर्दै महानगर |

घुम्तीगोठबाट पर्यटकीय गन्तव्य बनेको म्याग्दीको दोभान

घुम्तीगोठबाट पर्यटकीय गन्तव्य बनेको म्याग्दीको दोभान

म्याग्दी, २५ बैशाख । म्याग्दीको धवलागिरी गाउँपालिका–४ मा रहेको दोभान पछिल्लो समय पर्यटकीय गन्तव्यका रूपमा विकास हुँदै गएको छ । एक समय बर्खायाममा घुम्ती पशुगोठ राख्ने थलोका रूपमा सीमित रहेको दोभान अहिले धौलागिरि चक्रीय पदमार्गको आकर्षक गन्तव्य बनेको हो ।

समुन्द्री सतहदेखि करिब तीन हजार मिटर उचाइमा रहेको दोभान वरिपरि भिरालो पाखा, घना जङ्गल र अग्ला हिमालले घेरिएको रमणीय क्षेत्र हो । शान्त वातावरण, चराचुरुङ्गीको आवाज र प्राकृतिक सौन्दर्यले पर्यटकलाई लोभ्याउने गरेको छ ।

स्थानीय लक्ष्मण घर्तीका अनुसार करिब २० वर्षअघिसम्म दोभान खर्क र घुम्तीगोठमा सीमित थियो । धौलागिरि हिमाल आरोहण तथा धौलागिरि चक्रीय पदमार्ग हुँदै म्याग्दीबाट मुस्ताङ जाने पर्यटकले यहाँ बास बस्न थालेपछि यसको परिचय विस्तार भएको हो ।

धौलागिरि चौथो हिमालको फेदबाट बग्ने कुनावाङ खोला र धौलागिरि पहिलोबाट आउने म्याग्दी नदी मिसिने स्थान भएकाले यस क्षेत्रको नाम दोभान राखिएको स्थानीयवासी बताउँछन् ।

दोभानबाट एक दिनको पैदल यात्रापछि धौलागिरि हिमालको इटाली आधार शिविर र कुनावाङ ताल पुग्न सकिन्छ । गोलो आकारको कुनावाङ ताल प्राकृतिक रूपमा सफा रहने स्थानीयको भनाइ छ । स्थानीय सोम पुनका अनुसार उक्त क्षेत्रमा जापानी अनुसन्धानकर्ताले हिममानवसम्बन्धी अध्ययनसमेत गरिरहेका छन् ।

दोभान आसपासका पहाडी क्षेत्रमा मृग, झारल र घोरललगायत वन्यजन्तुको अवलोकन गर्न सकिन्छ । प्राकृतिक शान्त वातावरणमा रमाउन चाहने आन्तरिक पर्यटकका लागि दोभान उपयुक्त गन्तव्य बन्दै गएको छ । बसन्तयाममा फुल्ने लालीगुराँस र बर्खायाममा फुल्ने बुकीले यहाँको सौन्दर्य थप आकर्षक बनाउने गरेको छ ।

पर्यटकको सुविधाका लागि दोभानमा दुई वटा होटल सञ्चालनमा छन्, जहाँ करिब ५० जनासम्म बास बस्न सक्ने व्यवस्था छ । यहाँ रातो च्याउ र निगालोको टुसाबाट बनेका स्थानीय परिकारको स्वाद लिन सकिन्छ ।

म्याग्दीखोला जलविद्युत आयोजनाले निर्माण गरेको पहुँचमार्गका कारण अहिले दोभानसम्म जिप र मोटरसाइकल पुग्न थालेका छन् । बगरदेखि दोभानसम्म नौ किलोमिटर सडक विस्तार भएपछि आवतजावत र ढुवानीमा सहज भएको स्थानीयवासीले बताएका छन् ।

यसअघि बगरदेखि दोभान पुग्न पुरै दिन भिर, जङ्गल र खोल्साको कठिन बाटो हिँड्नुपर्ने अवस्था थियो । अहिले भने बेनीबाट करिब पाँच घण्टामै दोभान पुग्न सकिने भएको छ । यातायात सुविधा विस्तार भएसँगै पछिल्लो समय आन्तरिक पर्यटकको चहलपहल पनि बढ्न थालेको छ ।

 


Thali Mobile Pvt.Ltd.