नदी माथिको पुलको लठ्ठा चुँडियो, आवागमन बन्द

काठमाडौं । नुवाकोट विदुर नगरपालिका ६ त्रिशूली नदीको पक्की पुलको लठ्ठा चुँडिएपछि आवागमन पूर्णरुपमा बन्द भएको छ । देवीघाट जलविद्युत् केन्द्र निर्माणको समयमा करिब ४० वर्षअघि निर्माण भएको पुलका मुख्य चारमध्ये एउटा लठ्ठा चुडिँएकाले पुलबाट आवागमन बन्द गरिएको हो ।

गत पुस पहिलो साता पुलको लठ्ठामा समस्या देखिएपछि दुईपाङ्ग्रे सवारीसाधनलाई मात्र पुलबाट आउजाउको अनुमति दिइएको थियो । जतिसक्दो चाँडो मर्मतसम्भार गरेर पुल पुनः सञ्चालनमा ल्याउने विदुर नगरपालिकाका प्रमुख राजन श्रेष्ठले बताए ।