फेरी फोहोरलाई अवरोध, अब के गर्छ महानगर ?

काठमाडौं । सहमति कार्यान्वयन नभएको भन्दै काठमाडौँ उपत्यकाको फोहोर बञ्चरेडाँडा लैजान नुवाकोट र धादिङका स्थानीयले अवरोध गरेका छन् । बञ्चरेडाँडा ल्याण्डफिलसाइट प्रभावित क्षेत्र सरोकार समितिले यसअघि भएका सहमति कार्यान्वयन गरे मात्रै फोहर व्यवस्थापन गर्न दिने भन्दै अवरोध गरेको हो ।

सर्वपक्षीय भेलाबाट प्रस्तुत ११ बुँदे माग सम्बोधनका लागि गत फागुन २१ गते प्रधानमन्त्रीसमक्ष पेस गरिएका मागको सुनुवाइ नभएकाले आन्दोलनमा उत्रिएको समितिका संयोजक श्रीराम ढुङ्गानाले बताए ।

बिहानैदेखि फोहर विसर्जनस्थल नुवाकोटको सिसडोलस्थित कुडुल्ले र धादिङको बञ्चरेडाँडा पुग्ने सडक अवरुद्ध पारिएको उनले जानकारी दिए । यहाँ दैनिक एक हजार पाँच सय टन फोहोर व्यवस्थापन हुदै आएको छ ।