आरोहण अवधिभर आधार शिविरमा गाउँपालिकाको पनि उपस्थिति रहने

काठमाण्डौ । सगरमाथा आरोहणका लागि यस वर्षको बाटो बनाउने काम शुरु भएको छ । सगरमाथा प्रदुषण नियन्त्रण समिति एसपीसीसीले खटाएका आइसफल डाक्टरको टोलीले बाटो बनाइरहेको हो ।

दोस्रो शिविरसम्मको बाटो बनाउने जिम्मा लिएको उत्त समितिले बाटो बनाइरहेको हो । दोस्रो शिविरसम्म एसपीसीसी र त्योभन्दा माथि नेपाल पर्वतारोहण संघको समन्वयमा बाटो बनाउने काम हुन्छ । आरोहणको व्यवस्थापनका लागि ट्रेकिङ एजेन्सीले आधार शिविरमा सामान पुर्याउने लगायत बन्दोबस्तीका काम गरेका छन् ।

यस्तै अनुमतिका लागि टोलीले सम्पर्क गर्न थालेका पर्यटन विभागले जनाएको छ । अहिले खुम्बु आइसफलमा बाटो बनाउने काम भइरहेको एसपीसीसीले जनाएको छ ।

आधार शिविरमा कुनै उपस्थिति नजनाउने पालिकाले यस वर्षदेखि आधार शिविरमै मानिस राखेर निमयन गर्ने भएको छ । आरोहणलाई व्यवस्थित गर्न यसपालीदेखि केही नयाँ व्यवस्थाहरु गरेको गाउँपालिकाले जनाएको छ ।

गाउँपालिकाको नयाँ नियमअनुसार यस पटकदेखि आरोहीले आधारशिविरभन्दा माथिबाट आफ्नो दिसा अनिवार्य फिर्ता ल्याउनुपर्छ । सगरमाथा रहेको सोलुखुम्बुको खुम्बु पासाङ ल्हमु गाउँपालिकाले यसपालीदेखि नयाँ नियम लागू गरेको छ ।

गाउँपालिकाले जारी गरेको आधार शिविर व्यवस्थापनसम्बन्धी संशोधित कार्यविधिअनुसार आरोहण अवधिभर आधार शिविरमा गाउँपालिकाको पनि उपस्थिति रहनेछ ।