- ७ कार्तिक २०८३, शनिबार / Oct 24, 2026
घटस्थापनादेखि दसैँको नवौँ दिनसम्म ६ लाख ११ हजार ६५७ जनाले काठमाडौं छाडे।
पछिल्लो २४ घण्टामा ५८ हजार ३९६ जनाले उपत्यका छाडेका।
सवारी साधन १,१३,४१५ पुगेको छ, यात्रु मुख्यत: देशका पूर्वी, पश्चिमी र सुदूरपश्चिम जिल्लातिर।
काठमाडौंमा ७७,५४५ सवारी साधनबाट ३,१९,०१५ जनाले भित्रिएको तथ्यांक।
कोटेश्वर, कलङ्की, बल्खु, नयाँ बसपार्क, जगती नाकामा यात्रुको भीड।
काठमाडौं, १५ असाेज । दसैँको घटस्थापनादेखि आजसम्मको नवौँ दिनसम्ममा मात्रै छ लाख ११ हजार ६५७ जनाले काठमाडौं उपत्यका छाडेका छन्।काठमाडौं उपत्यका ट्राफिक प्रहरी कार्यालयका अनुसार घटस्थापना सुरु भएको असोज ६ गतेदेखि हालसम्म यात्रुहरू विभिन्न नाकाबाट राजधानी छाड्दै आएका छन्।
पछिल्लो २४ घण्टामा मात्र ५८ हजार ३९६ जनाले काठमाडौं छाडेका छन्। ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीका अनुसार “दसैँ सुरु भएसँगै राजधानी छाड्नेहरूको सङ्ख्या तीव्र रूपमा बढेको छ। काठमाडौं भित्रिने र बाहिरिने नाकामा सामान्य तरिकाले सवारी साधन चलिरहेका छन्।”
घटस्थापनादेखि आजसम्म काठमाडौं उपत्यकाबाट बाहिरिएका सवारी साधनको संख्या एक लाख १३ हजार ४१५ पुगेको छ। यिनै सवारी साधनमार्फत यात्रामा निस्किनेहरू मुख्यत: देशका पूर्वी, पश्चिमी र सुदूरपश्चिम प्रदेशका जिल्लाहरूमा गएका छन्।
उपत्यकामा हालसम्म ७७ हजार ५४५ सवारी साधनमार्फत तीन लाख १९ हजार १५ जना भित्रिएका छन्। विशेषगरी कोटेश्वर, कलङ्की, बल्खु, नयाँ बसपार्क, जगती लगायतका नाकामा यात्रुको भीड देखिएको छ।
