- ७ कार्तिक २०८३, शनिबार / Oct 24, 2026
विश्वको सातौँ अग्लो धौलागिरि हिमाल (८,१६७ मिटर) मा शरदयामको आरोहण सुरु ।
स्पेन, चीन र फ्रान्सका पर्वतारोहीले नेपाली शेर्पाको सहयोगमा सफल आरोहण ।
यस सिजनमा ७ महिला र १७ पुरुष गरी २४ जनाले आरोहण अनुमति लिएका ।
करिब रु ५० लाख ७१ हजार बराबरको शुल्क संकलन ।
२०२४ मा रसियाका पाँच पर्वतारोही हिउँपहिरोमा परी ज्यान गुमाएका थिए ।
धौलागिरि आरोहणलाई सबैभन्दा चुनौतीपूर्ण र जोखिमयुक्त मानिन्छ ।
म्याग्दी, १३ असाेज । विश्वको सातौँ (८,१६७ मिटर) अग्लो धौलागिरि हिमालमा चालु शरदयामको आरोहण सुरु भएको छ । धौलागिरि हिमाल म्याग्दीको धवलागिरि गाउँपालिका–४ मा अवस्थित छ ।
सभेन समिट ट्रेक्समार्फत आरोहणका लागि गएका तीन जना नेपाली शेर्पाको सहयोगमा स्पेन, चीन र फ्रान्सका एकरएक जनाले आइतबार धौलागिरिको सफल आरोहण गरेका हुन् ।
स्पेनका जर्ज इगोचेगा रोड्रिगेज, चीनका पिङ लु, फ्रान्सका क्याथरिन मार्सेल रोजा बरी, नेपालका पेमा नर्बु शेर्पा, तारमण तामाङ र पेम्बा टासी शेर्पाको टोलीले धौलागिरिको सफल आरोहण गरेका सेभन समिट ट्रेक्सका सञ्चालक मिङमा शेर्पाले जानकारी दिए।
उनका अनुसार १४ शिखर अभियान र सात शिखर पदयात्राका शेर्पाहरुको संयुक्त टोलीले शुक्रबार धौलागिरिको चुचुरोसम्म बाटो खोलेका र शनिबार ‘रोप फिक्सिङ’ (डोरी टाँगेका) थिए । पर्यटन विभागका अनुसार शरदयाममा धौलागिरि आरोहणका लागि तीन वटा समूहका सात महिला र १७ पुरुषले अनुमति लिएका छन् ।
अनुमति लिएकाबाट रु ५० लाख ७१ हजार सलामी दस्तुर (शुल्क) प्राप्त भएको छ ।गत वसन्तयाममा दुई वटा समूहका १५ जनाले आरोहण अनुमति लिएवापत रु ३६ लाख ९१ हजार दुई सय ६० राजस्व सङ्कलन भएको थियो ।
२०२४ को शरदयाममा एक वटा समूहका १४ जना पुरुष पर्वतारोहीहरुले आरोहणको अनुमति लिएकामा रसियाका पाँच जनाको हिउँपहिरोमा पुरिएर ज्यान गएको थियो । छिनछिनमा परिवर्तन हुने मौसम धौलागिरि आरोहणको चुनौती हो ।
अन्य हिमालको तुलनामा धौलागिरि आरोहणलाई जोखिमयुक्त र साहसिक मानिन्छ । सन् १९६० मे १३ मा अष्ट्रियाका कुर्ट डिम्बर्गरको टोलीले पहिलो पटक धौलागिरि हिमालको सफल आरोहण गरेको थियो । रासस
