- २ चैत्र २०८२, सोमबार / Mar 16, 2026
काठमाडौँ, २ फागुन । प्रधानमन्त्री सुशीला कार्कीले राष्ट्रिय प्रकृति संरक्षण कोषको अध्यक्षमा आफ्नै स्वकीय सचिव आदर्शकुमार श्रेष्ठलाई नियुक्त गर्ने निर्णय विवादमा परेको छ ।
प्रधानमन्त्री कार्की कोषकी संरक्षकसमेत रहनुभएको छ । उहाँले हिजो श्रेष्ठलाई आगामी पाँच वर्षका लागि कोषको अध्यक्षमा मनोनित गर्नुभएको हो । उक्त निर्णय सार्वजनिक भएसँगै विभिन्न राजनीतिक तथा नागरिक समूहले आलोचना गरेका छन् ।
नवयुवा आन्दोलनका अभियन्ताहरूले यो निर्णय आन्दोलनको मूल मर्मविपरीत भएको भन्दै विरोध जनाएका छन् । जेन–जी फ्रन्टकी संयोजक रक्षा बमले वर्तमान सरकारले पनि अघिल्ला सरकारजस्तै नातावाद र कृपावादको गलत नजिर स्थापित गरेको टिप्पणी गर्नुभएको छ ।
त्यसैगरी पूर्वमन्त्री महावीर पुनले प्रधानमन्त्रीले आफ्नै प्रमुख स्वकीय सचिवलाई कोषको नेतृत्वमा नियुक्त गर्नु उचित नभएको बताउनुभएको छ । पुनले सामाजिक सञ्जालमार्फत यस्तो पद स्वीकार नगरी प्रधानमन्त्रीको प्रतिष्ठा जोगाउन श्रेष्ठलाई आग्रहसमेत गर्नुभएको छ ।
उहाँले नातावाद र कृपावादकै कारण पुराना राजनीतिक दलहरू कमजोर बनेको उल्लेख गर्दै नयाँ नेतृत्वले पनि यस्तै अभ्यास दोहोर्याए त्यसको परिणाम उस्तै हुन सक्ने चेतावनी दिनुभएको छ । प्रधानमन्त्रीको निर्णयबारे औपचारिक प्रतिक्रिया भने सरकारले सार्वजनिक गरिसकेको छैन ।
