- २ चैत्र २०८२, सोमबार / Mar 16, 2026
काठमाडौँ, ३० फागुन । राष्ट्रिय स्वतन्त्र पार्टी (रास्वपा) को सचिवालय बैठक आज बस्दैछ। बैठकले समानुपातिकतर्फका सांसद चयन र पार्टी विधान संशोधनसम्बन्धी विषयमा निर्णय गर्ने तयारी गरिएको छ।
निर्वाचन आयोगले समानुपातिक सिट पाएका राजनीतिक दलहरूलाई भोलिसम्म उम्मेदवारको नामावली पेस गर्न पत्राचार गरेपछि रास्वपाले सचिवालय बैठक बोलाएको हो। प्रत्यक्षतर्फ १२५ सिट जितेको रास्वपाले समानुपातिकतर्फ ५७ सिट प्राप्त गरेको छ।
आजको बैठकले समानुपातिक सांसदको टुंगो लगाउनुका साथै विधान संशोधनका लागि प्रस्ताव तयार गर्ने जनाइएको छ। उक्त प्रस्ताव केन्द्रीय समितिले अनुमोदन गरेपछि संसदीय दलको नेता चयन प्रक्रिया अघि बढ्नेछ।
हालको विधानअनुसार पार्टीका सबै सदस्यको मतदानबाट संसदीय दलको नेता चयन गर्ने व्यवस्था छ। तर, समय सान्दर्भिक बनाउन सो व्यवस्था परिमार्जन गर्ने तयारी रास्वपाले गरेको छ।
चुनावअघि पार्टीका वरिष्ठ नेता बालेन्द्र शाहलाई भावी प्रधानमन्त्रीका रूपमा घोषणा गरिएको थियो। उनलाई संसदीय दलको नेता चयन गरी सरकार गठन प्रक्रिया अघि बढाउने रणनीतिमा पार्टी रहेको बताइएको छ।
