- १६ जेष्ठ २०८३, शनिबार / May 30, 2026
काडमाण्डौ । धादिङ बैरेनीको सडकमा लेदो बगिरहेकोले साना गाडी गुड्न समस्या भएको छ । लगातारको वर्षाका कारण विभिन्न सडकको यात्रा कष्टकर बन्दै गएको हो । सङ्घीय राजधानी काठमाण्डौ जोड्ने नागढुङ्गा–मलेखु–मुग्लिन सडक विस्तारका कारण धेरैजसो ठाउँमा सडक भत्काएर छाडिएकोले पानी परेसँगै हिलाम्य हुने गरेको छ ।
काठमाण्डौबाट झण्डै १ सय किलोमिटरको दूरीमा रहेको मुग्लिन पुग्नै ७ र ८ घण्टा लाग्ने गरेको छ । मुग्लिनबाट पोखरा जाने ए सय किलोमिटर बाटोको अवस्था पनि दयनिय बन्दै गएको छ । पोखरालाई सरकारले पर्यटकीय राजधानी घोषणा गरे पनि बेहाल सडकका कारण पोखरा पुग्नै मुस्किल रहेको यात्रीहरुको भनाई रहेको छ ।
यस्तै भक्तपुरको सूर्यविनायकदेखि धुलिखेलसम्मकाे सडक विस्तारका क्रममा खनिएको माटो बगेर सडक हिलाम्य बन्दा सूर्यविनायक र बनेपामा गाडी गुड्न समस्या भएको छ । बीपी राजमार्गको काभ्रे र सिन्धुलीका केही ठाउँमा पनि सडकमै गेग्रान थुप्रिदाँ आवागमन प्रभावित भएको छ ।
