- ३१ असार २०८३, बुधबार / Jul 15, 2026
बारा । हत्यापछि महिलाको शवलाई जलाउँदै गरेको अवस्थामा शवलाई प्रहरीले नियन्त्रणमा लिएको छ । शव जलिरहेकै अवस्थामा प्रहरीले शुक्रबार नियन्त्रणमा लिएको हो । पचरौता नगरपालिका–१ पिपरपातीका ३८ वर्षीया माल्तीदेवी नुनियाको जलाउँदै गरेको शवलाई अनुसन्धानको लागि नियन्त्रणमा लिएको प्रहरी उपरीक्षक विकासराज खनालले बताए ।
श्रीमान् र श्रीमतीबीच झगडा हुँदा श्रीमतीलाई मारेर घरमै लुकाएको सूचना पाएपछि प्रहरीको टोली गाउँ पुगेको थियो । प्रहरी गाउँमा पुग्दा रामदयाल महतो नुनियाले श्रीमती नुनियाको शवलाई जलाउँदै गरेको भेटेपछि शवलाई नियन्त्रणमा लिएको हो । शवका केही हाड फेला पारेको र मृतकका श्रीमान्, सासू ससुरा सबै फरार रहेकोले घटनाका बारेमा अनुसन्धान भइरहेको प्रहरीले जानकारी दिएको छ ।
मृतकको माइती पक्षले सो घटनाको बारेमा जानकारी दिएपछि प्रहरी तत्कालै गाउँमा पुगेको थियो । तराईका जिल्लामा दाइजोका कारणले नै श्रीमतीलाई मार्ने गरेका कयौँ उदाहरण भेटिन्छ ।
