- ३१ असार २०८३, बुधबार / Jul 15, 2026
तनहुँ, ३० चैत । तनहुँको आँबुखैरेनी गाउँपालिका–४ मा रहेको मर्स्याङ्दी जलविद्युत् केन्द्रले हाल आफ्नो कुल ६९ मेगावाट क्षमताको करिब ४० प्रतिशत अर्थात् ३० मेगावाट मात्र विद्युत् उत्पादन गरिरहेको छ ।
केन्द्रका प्रमुख इन्जिनीयर पशुपति गौतमका अनुसार लामो समयदेखिको सुख्खायाम र नदीमा पानीको बहाव कम हुँदा उत्पादनमा कमी आएको हो । “यस वर्ष हिउँदमा पानी परेन, लामो खडेरीले विद्युत् उत्पादन ४० प्रतिशतमा झरेको छ,” गौतमले भने । उनले सामान्य अवस्थामा ४० मेगावाट उत्पादन हुनुपर्नेमा हाल ३१ मेगावाट हाराहारीमा मात्र उत्पादन भएको बताए ।
यो केन्द्रमा २३–२३ मेगावाट क्षमताका तीनवटा टर्बाइन छन्, जुन सन् १९८९ मा निर्माण सम्पन्न भएको थियो । यहाँबाट उत्पादित विद्युत् चितवनको भरतपुर र काठमाडौंको स्युचाटार स्टेशन हुँदै राष्ट्रिय प्रसारण लाइनमा जोडिन्छ ।
गौतमले सुख्खायामका कारण नदीमा मिसिने खोला, खोल्सी र झरनाको पानी सुकेको वा घटेकोले उत्पादनमा असर परेको बताए । “वैशाखबाट घाम चर्को भएपछि हिउँ पग्लने र वर्षा बढ्ने हुँदा उत्पादन वृद्धि हुने अपेक्षा छ,” उनले थपे ।
मर्स्याङ्दी नदी हिमालबाट बग्ने भएकाले चिसो मौसममा हिउँ कम पग्लिन्छ र सहायक खोला–नदीहरूमा पानीको बहाव घट्छ, जसले विद्युत् उत्पादनमा कमी ल्याउँछ । सुख्खा मौसममा उत्पादन घट्दा नेपाल विद्युत् प्राधिकरणले भारतबाट विद्युत् आयात गर्नुपर्ने बाध्यता रहेको छ ।
