- २५ फाल्गुन २०८२, सोमबार / Mar 9, 2026
१० बैशाख २०७७ काठमाण्डौ । कोरोना भाइरस (कोभिड १९) को सङ्क्रमण जनावरबाट नै मानिसमा सरेको विश्व स्वास्थ्य सङ्गठन (डब्ल्यूएचओ) ले दाबी गरेको छ । चीनले कोरोना भाइरस बनाइएको भन्ने हल्लाको कुनै तुक नभएको भन्दै विश्व स्वास्थ्य सङ्गठनले कोरोना भाइरसको सङ्क्रमण जनावरबाट नै मानिसमा सरेको दाबी गरेको हो ।
आधार हिन व्यक्तिले लगाएको आरोपको भ्रममा नपर्न विश्व स्वास्थ्य सङ्गठनका प्रवक्ता फडेला चैबले जनावरबाट मानिसमा कोरोना सङ्क्रमण सरेको भए पनि अहिलेसम्म कसरी सरेको हो भन्ने बारेमा स्पष्ट हुन नसकेको बताएका छन् । गत हप्ता अमेरिकी राष्ट्रपति डोनाल्ड ट्रम्पले कोरोना भाइरस चीनको वुहानको एउटा प्रयोगशालामा बनेको आधारहिन कुरा गरेका थिए ।
चार महिनाअघि वुहानमा पहिलो पटक कोरोनाको सङ्क्रमण भेटिएको थियो । तर कोरोना भाइरस प्रयोगशालामा बनाइएको भन्ने कुराको आधार कतै पनि नभएको प्रवक्ता चैबको दावी छ । अमेरिकामा मात्रै गएको २४ घण्टामा २७ सयभन्दा धेरैको ज्यान गएको छ । योसँगै अमेरिकामा मात्रै ज्यान गुमाउनेको सङ्ख्या ४५ हजार ३३४ नाघेको छ भने आठ लाख १९ हजार १७५ भन्दा धेरैमा कोरोना सङ्क्रमण पुष्टि भएको छ ।
