रुकुम पूर्वबाट प्रचण्ड विजयी, नेकपाले खोल्यो जितको खाता

काठमाडौं २२, फागुन । नेपाली कम्युनिस्ट पार्टी (नेकपा) का संयोजक पुष्पकमल दाहाल प्रचण्ड प्रतिनिधिसभा सदस्य पदमा विजयी भएका छन् ।

शुक्रबार सार्वजनिक अन्तिम मतपरिणाम अनुसार प्रचण्ड रुकुम पूर्वबाट १० हजार २४० मतसहित निर्वाचित भएका हुन् । यससँगै नेकपाले प्रतिनिधिसभा निर्वाचनमा जितको खाता खोलेको छ ।

निर्वाचन अधिकृतको कार्यालयका अनुसार नेकपा एमालेका उम्मेदवार लिलामणि गौतम ले ३ हजार ४६२ मत प्राप्त गरेका छन् । त्यस्तै नेपाली कांग्रेसकी उम्मेदवार कुशुमदेवी थापा ले ३ हजार ८१ मत पाएकी छन् ।

मतगणनाको अन्तिम परिणामसँगै प्रचण्ड फराकिलो मतान्तरसहित विजयी भएको निर्वाचन कार्यालयले जनाएको छ ।