‘प्रतिकुल अवस्थामा जहाजहरु ग्राउन्डेड गरिने’

काठमाडौँ । जहाजको संख्याअनुसार माग नहुने अवस्थामा जहाजहरु ग्राउन्डेड गर्ने र स्टाफलाई बेतलवी विदामा बस्न प्रोत्साहन गर्ने वायुसेवा सञ्चालक संघ, नेपालले बताएको छ ।

कोरोनाभाइरसका कारण विश्वभरको अर्थतन्त्रमा नकारात्मक प्रभाव परेको र यसको प्रत्यक्ष प्रतिकुल प्रभाव हवाई क्षेत्रमा समेत देखिएको भन्दै यस्तो निर्णय गरेको हो । यस्तो अवस्थामा स्टाफको सेवा सुविधा समेत कटौती गर्ने निर्णय गर्दै वायुसेवा सञ्चालकको बैठकले नेपालको आन्तरिक हवाई उडानमा ४ अर्बभन्दा बढी आम्दानी घट्ने अनुमान गरेको छ ।

दुई महिना यता आन्तरिक हवाई यात्रामा विदेशी पर्यटकको संख्या ४० प्रतिशतले घटेको भन्दै बुकिङहरु धमाधम रद्द हुन थालेको संघले जनाएको छ । चीन, हङकङ, कोरिया, थाइल्याण्ड, भारत, मध्यपूर्वी मुलुकमा कोरोनाको प्रकोप देखिएकोले हवाई बुकिङ रद्द हुने क्रम अझ बढ्ने संघको अनुमान छ ।