- २५ फाल्गुन २०८२, सोमबार / Mar 9, 2026
२२ बैशाख २०७७ काठमाडौं । कोरोना भाइरसको संक्रमण ५ नम्वर प्रदेशको बाँके तर्फ फैलिरहेका बेला कर्णाली प्रदेश एक हप्ता सिल गरिने भएको छ । संक्रमण फैलन नदिन कर्णाली प्रदेश सरकारले सबै नाका सिल गर्ने निर्णय गरेको हो ।
मुख्यमन्त्री महेन्द्रबहादुर शाहीको संयोजकत्वमा प्रदेश विपद् व्यवस्थापन परिषद्को आज बसेको बैठकले कर्णाली प्रदेश छिर्ने सबै नाकाहरु सिल गर्ने निर्णय गरेको मुख्यमन्त्री तथा मन्त्रिपरिषदको कार्यालयले जनाएको छ ।
कार्यालयका अनुसार बाँके, सल्यान, कैलालीको नाका भएर कर्णाली प्रवेश गर्ने नाकाहरुमा सुरक्षा व्यवस्था कडाइ गरेर चेकजाँच पनि गरिएको छ । प्रदेशका विभिन्न २७ स्थानमा चिकित्सकसहितको स्वास्थ्यकर्मीको टोली खटाउने प्रदेश सरकारको तयारी रहेको सामाजिक विकास मन्त्री एवं प्रदेश स्तरीय कोभिड–१९ रोकथाम तथा नियन्त्रण उच्चस्तरीय कार्यकारी समितिका संयोजक दल रावलले बताए ।
प्रदेशका हरेक जिल्लाका पालिकाका केन्द्र, बजारहरूमा स्वाब संकलन गरी द्रुत परीक्षण पनि गरिने छ । नेपालमा अहिलेसम्म जम्मा ७५ जनामा कोरोना भाइरसको संक्रमण पुष्टि भइसकेको छ भने १६ जना निको भएर घर फर्किसकेका छन् । अहिले सम्म कर्णाली प्रदेशमा कोरोना भाइरसको संक्रमण देखिएको छैन ।
