धनुषा बम बिस्फोटमा प्रहरी इन्सपेक्टरसहित ३ जनाको मृत्यु

धनुषा । गएराती भएको शक्तिशाली बम बिस्फोटमा प्रहरी निरीक्षकसहित ३ जनाको ज्यान गएको छ भने चार जना गम्भीर घाइते भएका छन् । क्षिरेश्वरनाथ नगरपालिका वडा नं ५ महेन्द्रनगर बजारमा शुक्रबार मध्यराति राजेश साहको घरको गेटमा राखिएको बम विस्फोट हुँदा राजेश र उनका छोरा आनन्दको घटनास्थलमै मृत्यु भएको हो ।

विस्फोटमा परी घाईते भएका इलाका प्रहरी कार्यालय महेन्द्रनगरका प्रहरी निरीक्षक अमिरकुमार दाहालको पनि मृत्यु भएको जिल्ला प्रहरी कार्यालय धनुषाले जनाएको छ । विस्फोटमा परी प्रकाश, निक्कीकुमारी र भिखारी साह घाइते भएका छन् । प्रहरी जवान रिजनाथकुमार महतो घाइते भएका छन् ।

घाइतेलाई उपचारका लागि धरान लगिएको छ । खबर पाउनासाथ प्रहरी निरीक्षक दाहालको नेतृत्वमा गएको प्रहरी टोलीले गेटमा झुन्डिएको झोला बम हो वा होइन भनी अनुसन्धान गर्ने क्रममा बम विस्फोट भएको प्रहरीले बताएकाे छ । प्रहरीले घटनाको तिब्र रुपमा अनुसन्धान अघि बढाएको छ ।