- २२ जेष्ठ २०८३, शुक्रबार / Jun 5, 2026
काठमाडौं । मापदण्ड विपरितका खाद्यबस्तुको विगविगी बजारमा मात्रै होईन, मन्त्रीको टेवलसम्म पुगेको छ । वाणिज्य आपूर्ति तथा उपभोक्ता संरक्षण विभागले गर्ने अनुगमन फितलो हुँदा मापदण्ड विपरितका खाद्यबस्तुको विगविगी भेटिएको हो ।
मन्त्रालयले आफ्नो प्रगति र भावी कार्ययोजनाबारे जानकारी दिन मन्त्रालयमै आइतबार पत्रकार सम्मेलन गरेको कार्यक्रममा पिउने पानी भन्दै बोतल दिएको र उक्त बोतलमा लेबल नै थिएन । ‘एकुवा हन्ड्रेड ब्राण्ड’को पिउने पानीका बोतलमा लेबल उल्लेख नहुनु उपभोक्ता संरक्षण ऐन २०७५ विपरित भएको सहभागीले बताए।
उपभोक्ता संरक्षण ऐनको दफा ६ (२) को ‘च’मा उत्पादकले आफुले उत्पादन गरेका बस्तुको बिक्री मूल्य, व्याच नम्बर र उत्पादन मिति अनिवार्य उल्लेख गर्नुपर्ने व्यवस्था छ । तर, मन्त्रालयमा मन्त्री लेखराज भट्ट र सचिव बैकुण्ठ अर्याललाई दिइएको पानीमा भने उत्पादन मिति, व्याच नम्बर केही पनि उल्लेख थिएन ।
उक्त बोतलहरुमा लेबल उल्लेख नभएको भेटेपछि सो पानी वाणिज्य, आपूर्ति तथा उपभोक्ता संरक्षण विभागका महानिर्देशक नेत्र सुवेदीको जिम्मा लगाएको थियो ।
