- २५ फाल्गुन २०८२, सोमबार / Mar 9, 2026
२२ जेठ २०७७, काठमाडौं । लकडाउनको अवज्ञा गर्दै काठमाडौंका केहि स्थानमा व्यापारीले पसल खोलेका छन् । कर तिर्न, घरभाडा, बैंकको किस्ता र कर्मचारीको तलब भुक्तानी गर्न समस्या भएकोले पसल खुल्ला गर्नुपरेको व्यापारीले बताएका छन् ।
तर प्रहरीले लकडाउन उलंघन भए देश नै समस्यामा पर्ने भन्दै पसल बन्द गर्न आग्रह गर्दा व्यापारी र प्रहरीबीच भनाभन समेत भएको छ । न्यूरोडमा रहेका अधिकांस पसहलरु खुलेका छन् । सरकारले गत चैत ११ गतेदेखि जारी गरेको लकडाउन लम्बिदै गएपछि पसल व्यवसाय गर्ने व्यवसायीहरुले बिहीबारदेखि पसल खोल्न थालेका हुन् ।
व्यवसायीहरुको संगठन नेपाल राष्ट्रिय व्यवसायी महासंघका अध्यक्ष नरेश कटुवालले सामाजिक दुरी कायम गर्दै बिहान ८ बजे देखि ११ बजे सम्म पसल सञ्चालन गरिएको बताए । नेपाल सरकारले तोकेको मापदण्ड अनुसार सुरक्षा सतर्कता अपनाएर पसल खोलेको व्यापारीले बताएका छन् ।
सरकारलाई कर तिर्न, घरभाडा, बैंकको किस्ता र कर्मचारीको तलब दिन समस्या भएकोले पसल खुल्ला गर्न बाध्यता भएको अध्यक्ष कटुवालले बताए। लकडाउनका कारण लामो समय सम्म व्यवसाय बन्द हुँदा व्यवसायीहरु समस्यामा परेकाले पसल खोल्न बाध्य भएको जिकिर गरेका छन् । यता सरकारले लकडाउनको अवज्ञा गर्नेलाई कारवाही गर्ने जनाएको छ ।
