सन्दीपलाई एक हप्ता हिरासतमा राख्न अनुमति

काठमाडौं । नेपाली राष्ट्रिय क्रिकेट टोलीका पूर्व कप्तान सन्दीप लामिछानेलाई थप सात दिन हिरासतमा राखेर अनुसन्धान गर्न जिल्ला अदालत काठमाडौंले अनुमति दिएको छ । २० गतेबाट गणना हुने गरी म्याद थप गरेको हो ।

१७ वर्षीया नाबालिगमाथि बलात्कार गरेको आरोप लागेका सन्दीपलाई असोज २० गते प्रहरीले पक्राउ गरी सोमबार अदालतमा उपस्थित गराएको थियो । दशैं बिदाका कारण अदालत बन्द रहेकाले सोमबार मात्रै म्याद थपका लागि अदालत लगिएको हो ।

सन्दीपले इजलासमा आफू निर्दोष रहेको प्रमाणहरु प्रस्तुत गरेको बताइएको छ । २७ गते अदालतमा फेरि हाजिर हुने शर्तमा सात दिनको लागि म्याद थपिएको हो ।

अभियोग लगाएपछि अनुसन्धानका लागि सन्दीपलाई दशैंको भोलिपल्ट नेपाल आएलगत्तै विमानस्थलबाट नै पक्राउ गरिएको थियो । किशोरीले भदौ २१ गते प्रहरी वृत्त गौशालामा उजुरी गरेकी थिइन् ।