समयमा हिमपात हुँदा हिउँदे बालीलाई फाइदा पुग्ने

काठमाण्डौ । मुस्ताङ, मनाङ, उपल्लो डोल्पा लगायतका क्षेत्रमा हिमपात भएको छ । हिमपातका कारण अन्नपूर्ण पदमार्गमा पदयात्रामा हिँडेका आन्तरिक एवम् बाह्य पर्यटक समस्यामा परेका छन् ।

बुधबार पनि उच्च पहाडी र हिमाली जिल्लामा हिमपातको सम्भावना रहेको मौसमविद्ले बताएका छन् । पश्चिमी वायुको प्रभावका कारण वर्षासँगै हिमपात हुन थालेको मौसमविद्ले जनाएका हुन । पानी परेका उच्च पहाडी र हिमाली क्षेत्रमा हिमपात भइरहेको छ ।

हिमपात भएपछि याक, चौँरीलाई घाँस पनि राम्रोसँग पलाउने भएकाले समस्या नहुने देखिन्छ । गत वर्ष ढिलो गरी हिमपात हुँदा खेतीबालीलाई पानीको अभाव भएको थियो ।

यसवर्ष चाँडो हिमपात भएकाले हिउँदेबालीलाई फाइदा हुने अपेक्षा गरिएको छ । समयमा हिमपात हुँदा किसान भने दंग परेका छन् । समयमा नै हिमपात हुँदा बालीनालीलाई फाइदा पुग्ने र उत्पादन बढ्ने देखिन्छ ।