गोली प्रहार गरेर लुटपाट

सुनसरी । गोली प्रहार गरेर त्रसित बनाउँदै लुटपाट गरेको घटना बाहिरिएको छ । हरिनगरा गाउँपालिका २ का ३० वर्षीय आशिफ अन्सारीको साथमा रहेको ५ लाख ३५ हजार रूपैयाँ नगद दिउँसो लुटिएको प्रहरीले जनाएको छ।

अन्सारीमाथि इनरुवा नगरपालिका ९ र हरिनगरा ३ को सिमानास्थित नहर नजिकको एकान्त स्थानमा लुटपाट भएको कोशी प्रदेश प्रहरी कार्यालय विराटनगरका प्रवक्ता एसपी दीपक पोखरेलले बताए । अन्सारी जग्गा बिक्री गरेको रकम बोकेर मालपोत कार्यालयबाट घरतर्फ फर्कँदै थिए ।

एसपी पोखरेलले भने, ‘गोली पड्किएको जस्तो आवाज सुनेपछि बाटैमा मोटरसाइकल रोकेर वरपर हेरेछन् । अर्को मोटरसाइकलमा आएका ३ जना व्यक्ति साथमा भएको पैसाको झोला लुटेर फरार बनेको जानकारी आएको छ । घटनामा संलग्नको पहिचान हुन सकिरहेको छैन । ठाउँठाउँमा प्रहरी परिचालन गरेर खोजी तीव्र पारिएको छ ।’