- २५ भाद्र २०८३, बिहीबार / Sep 10, 2026
कैलाली, २५ माघ । लम्कीचुहा नगरपालिका–४, कौवापुरस्थित खल्ला क्षेत्रमा विवाह कार्यक्रममा सहभागी भई फर्किरहेका १९ वर्षीय युवक अर्जुन बि.क. माथि सामूहिक आक्रमण भएको छ । धारिला तथा घातक हतियार प्रयोग गरी अन्धाधुन्ध प्रहार गरिएपछि उनी गम्भीर घाइते भएका छन् ।
घटना माघ २१ गते राति करिब ११ बजे भएको हो । स्थायी ठेगाना लम्कीचुहा नगरपालिका–४, कौवापुर निवासी अर्जुन बि.क. आफ्नै गाउँका दुई जना भाइलाई “रात धेरै भइसक्यो, घर जाऊ” भन्दै सम्झाइरहेका बेला उनीहरूसँगै आएका व्यक्तिहरूको समूहले पछाडिबाट एक्कासि आक्रमण गरेको प्रारम्भिक विवरणमा उल्लेख छ । आक्रमणकारीहरूले खुकुरी, ग्राशा, तरबार, बन्चरो, खुडा, भट्टा तथा नाइनस्टिक (Nine Stick) जस्ता धारिला हतियार प्रयोग गरी अन्धाधुन्ध प्रहार गरेका थिए । गम्भीर घाइते अवस्थामा पुगेका अर्जुनलाई मरेको ठानी नजिकैको खेतमा फालेर आक्रमणकारीहरू फरार भएको बताइएको छ ।
अचेत अवस्थामा रहेका अर्जुनले घरमा फोन गरी “मम्मी, मलाई खुकुरी हानेर मारे” भनेर भनेपछि थप बोल्न नसकी बेहोस भएका थिए । परिवारजनले १–२ घण्टासम्म खोजी गर्दा पनि फेला पार्न नसकेपछि गाउँघरमा बुझ्दै जाँदा उनी खेतमा मरेतुल्य अवस्थामा भेटिएका थिए । उनको शरीरभरि गहिरा चोट लागेको र अत्यधिक रक्तश्राव भई कपडा पूरै रगतले लतपतिएको अवस्थामा फेला परेको जनाइएको छ ।
घटनापछि उनलाई रातारात नेपालगञ्जस्थित न्यूरो अस्पताल लगेर उपचार भइरहेको छ । चिकित्सकका अनुसार उनको अवस्था गम्भीर रहेको छ । प्रारम्भिक अनुसन्धान अनुसार घटनामा करिब १२–१३ जनाको समूह संलग्न रहेको बताइएको छ । हालसम्म पहिचान भएका आरोपितहरूमा लम्कीचुहा नगरपालिका–१, थकालिपुर निवासी दुर्गे थापा मगर, विकास भण्डारी क्षेत्री र हिक्मत जैशी तथा लम्कीचुहा नगरपालिका–४ निवासी जीवन टमटा र विकास बि.क. रहेका छन् । अन्य संलग्न व्यक्तिहरूको खोजी कार्य जारी रहेको प्रहरीले जनाएको छ ।
घटनाबारे थप अनुसन्धान भइरहेको र दोषीलाई कानुनी दायरामा ल्याइने जिल्ला प्रहरी कार्यालय कैलालीले जनाएको छ । स्थानीयवासीले घटनाको निष्पक्ष छानबिन गरी दोषीमाथि कडा कारबाही गर्न माग गरेका छन् ।
