- २८ आश्विन २०८३, बुधबार / Oct 14, 2026
मनाङ, २६ माघ । मनाङ जिल्लाको नासोङ गाउँपालिका र लमजुङ जिल्लाको मर्स्याङदी गाउँपालिकाको सीमामा ३० मेगावाट क्षमताको म्यार्दी जलविद्युत् आयोजना निर्माण हुने भएको छ।
आयोजना निर्माणको प्रक्रिया अन्तर्गत वन तथा वातावरण मन्त्रालयले वातावरणीय प्रभाव मूल्यांकन (EIA) प्रतिवेदन तयारीको काम सुरु गरेको छ। म्यार्दी खोला हाइड्रोपावर कम्पनी प्रालि आयोजनाको प्रस्तावक रहेको छ।
नदी प्रवाही (Run-of-the-River) प्रकृतिको यस आयोजनाबाट वार्षिक औसत १७३.४४ गिगावाट घण्टा विद्युत् उत्पादन हुने अनुमान गरिएको छ। आयोजनाबाट उत्पादन हुने विद्युत् १० किलोमिटर लामो १३२ केभी क्षमताको प्रसारण लाइनमार्फत धारापानीस्थित २२० केभी क्षमताको मनाङ सबस्टेसनमा जोडेर राष्ट्रिय प्रसारण प्रणालीमा प्रवाह गरिनेछ।
आयोजनाको कुल लागत तीन अर्ब ९० करोड ९७ लाख रुपैयाँ रहनेछ। यसअनुसार प्रतिमेगावाट लागत १३ करोड तीन लाख रुपैयाँ पर्नेछ। वन तथा वातावरण मन्त्रालयले आयोजनाका कारण पर्न सक्ने सम्भावित वातावरणीय प्रभावबारे सरोकारवाला तथा स्थानीयवासीलाई सुझाव तथा जानकारी दिन आग्रह गरेको छ।
