मुख्य बुँदा
एक वर्षमा करिब ६१ अर्ब रुपैयाँ बराबरको कुखुराको मासु कारोबार
अण्डा बिक्री १४ अर्ब ८२ करोड रुपैयाँ बराबर
देशभर २३ हजारभन्दा बढी फार्म सञ्चालनमा
करिब ६३ हजार ८ सय किसान संलग्न
व्यवसाय परम्परागतबाट व्यावसायिकतर्फ रूपान्तरण
बागमती प्रदेश कुखुरापालनको प्रमुख केन्द्र
काठमाडौं, ७ फागुन । नेपालमा कुखुरापालन व्यवसाय तीव्र रूपमा विस्तार हुँदै गएको छ। राष्ट्रिय तथ्याङ्क कार्यालयले सार्वजनिक गरेको ‘नेपाल व्यावसायिक कुखुरापालन सर्वेक्षण २०८१/८२’ अनुसार एक वर्षमा झण्डै ६१ अर्ब रुपैयाँ बराबरको कुखुराको मासु कारोबार भएको छ।
त्यस्तै, अण्डा बिक्रीबाट मात्रै करिब १४ अर्ब ८२ करोड रुपैयाँको कारोबार भएको तथ्याङ्कमा उल्लेख छ। यसले कुखुरापालन क्षेत्रले देशको अर्थतन्त्रमा महत्वपूर्ण योगदान पुर्याइरहेको देखाएको छ। सर्वेक्षण अनुसार मनाङ र मुस्ताङ बाहेकका सबै जिल्लामा व्यावसायिक कुखुरापालन विस्तार भएको छ।
देशभर करिब २३ हजार फार्म सञ्चालनमा छन् भने करिब ६३ हजार ८ सय किसान यस व्यवसायमा संलग्न छन्। अधिकांश फार्म व्यक्तिगत स्वामित्वमा सञ्चालन भइरहेका छन्, तर करिब ६३.७ प्रतिशत फार्म मात्र सरकारी निकायमा दर्ता भएका छन्।
यो क्षेत्रले वार्षिक ८६ अर्ब रुपैयाँभन्दा बढीको प्रत्यक्ष आर्थिक कारोबार गर्दै हजारौँलाई रोजगारी प्रदान गरेको पनि प्रतिवेदनले देखाएको छ। भौगोलिक रूपमा बागमती प्रदेश कुखुरापालनको प्रमुख केन्द्र बनेको छ।
काठमाडौं उपत्यका र आसपासका क्षेत्रमा उच्च माग र बजारको सहज पहुँचका कारण यस क्षेत्रमा उत्पादन र व्यवसाय दुवै बढेको देखिन्छ। शिक्षित युवाहरूको प्रवेशसँगै आधुनिक प्रविधि र व्यवस्थापन सीपको प्रयोग बढ्दै गएको र यसले उत्पादनको गुणस्तर सुधार गर्न मद्दत गरेको सर्वेक्षणले जनाएको छ।
