ढोरपाटनसहित बागलुङको उच्च पहाडी क्षेत्रमा भारी हिमपात, जनजीवन प्रभावित

बागलुङ, ७ फागुन । नेपालको एकमात्र सिकार आरक्ष ढोरपाटन सिकार आरक्षसहित बागलुङको उच्च पहाडी क्षेत्रमा भारी हिमपात भएको छ। शुक्रबार दिउँसोदेखि सुरु भएको हिमपातले ढोरपाटन उपत्यका सेताम्य बनेको छ।

ढोरपाटन नगरपालिका–९ का स्थानीय धनबहादुर विकका अनुसार हिमपातका कारण वस्तुभाउलाई घाँस–दाना खुवाउन समेत कठिनाइ भएको छ। केही दिनदेखि सामान्य वर्षा भइरहे पनि अहिले निरन्तर हिमपात हुँदा दैनिक जीवन प्रभावित बनेको उनले बताए।

आलु रोपाइँका लागि बोबाङ, अधिकारीचौरलगायत क्षेत्रबाट ढोरपाटन उक्लिएका स्थानीयहरू हिमपातका कारण काम गर्न नसक्ने अवस्थामा पुगेका छन्।

स्थानीय तुलराम पुनका अनुसार अत्यधिक चिसो बढेको छ र रातिदेखिको हिमपातले बाहिर निस्किन तथा पशुचौपायाको हेरचाह गर्न समेत समस्या भएको छ। स्थानीयवासीले मौसम प्रतिकूलताका कारण दैनिकी कष्टकर बनेको बताएका छन्।