- २५ आश्विन २०८३, आईतवार / Oct 11, 2026
काठमाडौं , १३ माघ २०८२ । नेपाल क्रिकेट संघ (क्यान) ले आईसीसी पुरुष टी–२० विश्वकप २०२६ को तयारीस्वरूप दुईवटा वार्मअप खेल खेल्ने भएको छ । आईसीसीले सार्वजनिक गरेको वार्मअप खेल तालिकाअनुसार नेपालले विश्वकप अघि युएई र क्यानडासँग प्रतिस्पर्धा गर्नेछ ।
तालिकाअनुसार नेपालले युएईविरुद्ध फेब्रुअरी ३ मा चेन्नईस्थित एमए चिदम्बरम स्टेडियममा खेल्नेछ । उक्त खेल साँझ ५ बजेदेखि सुरु हुनेछ । त्यसैगरी नेपालले क्यानडाविरुद्ध फेब्रुअरी ५ मा चेन्नईमै खेल्ने तालिका रहेको छ । यो खेल दिउँसो १ : १५ बजेदेखि सुरु हुनेछ ।
विश्वकपको तयारीका लागि श्रीलंकामा अभ्यास सकेर नेपाली टोली भारत पुगेको छ । वार्मअप खेल अघि नेपालले भारतमा थप अभ्यास खेल पनि खेल्नेछ । क्यानका अनुसार नेपाली टोलीले जनवरी २९ मा मुम्बई क्रिकेट एसोसिएसन प्रेसिडेन्ट इलेभेनसँग र जनवरी ३१ मा सिसिआईसँग अभ्यास खेल खेल्ने तालिका रहेको छ ।
रोहित पौडेलको कप्तानीमा १५ सदस्यीय नेपाली टोली आईसीसी टी–२० विश्वकपमा तेस्रो पटक सहभागी हुँदैछ । आईसीसी पुरुष टी–२० विश्वकप आगामी फेब्रुअरी ७ देखि मार्च ८ सम्म भारत र श्रीलंकामा आयोजना हुनेछ ।
नेपाल रहेको समूहमा स्कटल्याण्ड, इङल्यान्ड, इटाली र वेष्ट इण्डिज छन् । नेपालले पहिलो खेल फेब्रुअरी ८ मा इङल्यान्डसँग खेल्नेछ । त्यसपछि फेब्रुअरी १२ मा इटाली, १५ मा वेष्ट इण्डिज र १७ मा स्कटल्याण्डसँग प्रतिस्पर्धा गर्ने तालिका छ ।
नेपालले समूह चरणका सबै खेल मुम्बईस्थित वाङखडे स्टेडियममा खेल्नेछ ।
