एजेन्सी, ११ साउन । गाजामा जारी मानवीय संकटका बीच हवाईमार्गबाट राहत सामग्री खसालिएको छ। इजरायली सेनाले खाद्यान्नलगायतको राहत गाजामा हवाई जहाजमार्फत खसालेको जनाएको छ भने जोर्डन र संयुक्त अरब इमिरेट्स (यूएई) ले पनि चाँडै यस्तै राहत पठाउने तयारी गरिरहेका छन्।

तर यो सहायता भोकमरीको समस्याको समाधानका लागि अपुग भएको अन्तर्राष्ट्रिय संस्था तथा मानवअधिकार समूहहरूले जनाएका छन्। अन्तर्राष्ट्रिय उद्धार समितिका अधिकारी सियारान डोनेली का अनुसार, “हवाई सहायता कहिल्यै पर्याप्त हुँदैन।”

हाल जोर्डन र इजिप्टमा करीब ६ हजार ट्रक राहत तयारी अवस्थामा भए पनि राजनीतिक अवरोधका कारण ती गाजामा प्रवेश गर्न सकेका छैनन्। विश्व खाद्य कार्यक्रम (WFP) का अनुसार गाजाको एक तिहाइ जनसङ्ख्याले केही दिनदेखि खाना पाएका छैनन्।

झण्डै ९० हजार महिला र बालबालिका आपतकालीन सहायताका लागि अति आवश्यक श्रेणीमा रहेका छन्। राहत वितरणमा झैझगडा, घाइते हुने र ज्यान गुमाउने खतरा पनि देखिएको छ।

खाद्यान्न मात्र होइन, गाजामा हाल पानीको समेत गम्भीर अभाव देखिएको अन्तर्राष्ट्रिय सञ्चार माध्यमहरूले जनाएका छन्। १०० भन्दा बढी अन्तर्राष्ट्रिय संस्थाहरूले गाजामा सामूहिक भोकमरीको चेतावनी दिइसकेका छन्।