- १० श्रावण २०८३, आईतवार / Jul 26, 2026
फ्रान्स र स्पेनमा भीषण डढेलोबाट २ लाख ५० हजारभन्दा बढी मानिस विस्थापित ।
फ्रान्समा सेना तथा ईयूका विमान र हेलिकोप्टर परिचालन ।
बोरदो आसपासका सात शहर खाली गराइयो ।
स्पेनमा ६० हजारभन्दा बढी मानिस सुरक्षित स्थानमा सारिए ।
इटाली र स्कटल्यान्डमा पनि डढेलोको जोखिम बढ्दै गएको छ ।
काठमाडौं, १० साउन । फ्रान्स र स्पेनमा फैलिएको भीषण डढेलोका कारण २ लाख ५० हजारभन्दा बढी मानिस विस्थापित भएका छन् । अत्यधिक तापक्रम र तीव्र हावाका कारण आगो नियन्त्रणमा कठिनाइ भइरहेको अधिकारीहरूले जनाएका छन् ।
फ्रान्सको दक्षिणपश्चिम क्षेत्रमा फैलिएको डढेलो बोरदो शहरतर्फ बढिरहेको छ । आगोको जोखिम बढेपछि बोरदोको पश्चिमका सात वटा शहरका बासिन्दालाई रातारात सुरक्षित स्थानमा सारिएको छ । फ्रान्सका अधिकारीहरूका अनुसार डढेलो अझै नियन्त्रणबाहिर रहेको छ । आगो बोरदोबाट करिब ४० देखि ५० किलोमिटर टाढासम्म फैलिएको छ भने धुवाँ शहरसम्म पुगेपछि स्थानीय बासिन्दाले तीव्र धुवाँको असर महसुस गरेका छन् ।
गिरोन्दे र लान्देस क्षेत्रमा मात्रै करिब दुई लाख मानिस लाई सुरक्षित स्थानमा सारिएको छ । डढेलो नियन्त्रणका लागि फ्रान्सले सेना परिचालन गरेको छ भने आगो फैलिन नदिन झाडी सफा गर्ने र अवरोध निर्माण गर्ने काम भइरहेको छ ।
युरोपेली संघका सदस्य राष्ट्रहरूले पनि फ्रान्सलाई सहयोग गरेका छन् । क्रोएसिया ले तीनवटा क्यानाडेयर विमान, पोर्चुगल ले दुईवटा एयर ट्र्याक्टर विमान, चेक गणतन्त्र र स्लोभाकिया ले ब्ल्याक हक हेलिकोप्टर तथा रोमानिया ले वन डढेलो नियन्त्रण टोली पठाएका छन् ।
युरोपेली आयोगकी अध्यक्ष उर्सुला भोन डेर लेयेन का अनुसार ईयूको संयुक्त अग्नि नियन्त्रण संयन्त्रमार्फत ११ वटा विमान तथा हेलिकोप्टर फ्रान्स र स्पेनमा परिचालन गरिएको छ । डढेलोका कारण आइतबार हुने तय भएको टुर डे फ्रान्स साइकल प्रतियोगिताको अन्तिम चरण १३३ किलोमिटरबाट घटाएर ८९ किलोमिटर मा सीमित गरिएको छ, ताकि सुरक्षा निकायलाई प्रभावित क्षेत्रमा परिचालन गर्न सहज होस् ।
यसैबीच, फ्रान्सका राष्ट्रपति इमानुएल म्याक्रोँ ले देशभर फैलिएका करिब ३० वटा डढेलो बारे छलफल गर्न आकस्मिक बैठक बोलाएका छन् । फ्रान्स सरकारले अवस्थालाई अभूतपूर्व संकटको संज्ञा दिएको छ । उता, स्पेनमा पनि डढेलोका कारण आपत्काल घोषणा गरिएको छ । राजधानी म्याड्रिड आसपास केही क्षेत्रमा मौसममा सुधार आएपछि आगोको तीव्रता केही घटे पनि जोखिम कायमै रहेको अधिकारीहरूले बताएका छन् ।
स्पेनका प्रधानमन्त्री पेड्रो सान्चेज ले मौसममा आएको सुधारलाई डढेलो नियन्त्रणको अवसरका रूपमा उपयोग गर्नुपर्ने बताएका छन् । गृह मन्त्रालयका अनुसार म्याड्रिड र अभिला क्षेत्रमा मात्रै करिब ६० हजार मानिसलाई सुरक्षित स्थानमा सारिएको छ भने २८ हजारभन्दा बढी मानिस अझै घरभित्रै बस्न बाध्य छन् ।
यस वर्ष स्पेनमा हालसम्म १ लाख ३० हजार हेक्टरभन्दा बढी वन क्षेत्र डढेलोले नष्ट गरिसकेको छ । फ्रान्समा पनि सन् २०२६ को सुरुदेखि हालसम्म ९८ हजार हेक्टरभन्दा बढी क्षेत्र आगलागीबाट प्रभावित भएको जनाइएको छ । यता, इटालीको सिसिली टापुमा ३५० भन्दा बढी स्थानमा डढेलो लागेको छ, जसमा १० वटा ठूला आगलागी समावेश छन् ।
प्रभावित क्षेत्रबाट सर्वसाधारणलाई सुरक्षित स्थानमा सारिएको छ । स्कटल्यान्डको केर्नगर्म्स राष्ट्रिय निकुञ्ज मा पनि १० दिनदेखि जारी डढेलो नियन्त्रणका लागि आपत्कालीन अवस्था घोषणा गरिएको छ । युरोपेली संघकी संकट व्यवस्थापन आयुक्त हाजा लाहबिब ले यस वर्ष युरोपमा डढेलोबाट हुने क्षति विगतका सबै रेकर्डभन्दा बढी हुन सक्ने चेतावनी दिएकी छन् ।
