- २८ भाद्र २०८३, आईतवार / Sep 13, 2026
काठमाडौं, १० साउन । भारतका केन्द्रीय शिक्षामन्त्री धर्मेन्द्र प्रधान ले पदबाट राजीनामा दिएपछि पाँच सातादेखि जारी विद्यार्थी आन्दोलन स्थगित गरिएको छ । आन्दोलनकारीहरूले यसलाई लोकतन्त्रको जितको रूपमा व्याख्या गर्दै प्रदर्शन अन्त्य गर्ने घोषणा गरेका छन् ।
बीबीसीका अनुसार दिल्लीको जन्तर–मन्तर मा आन्दोलनरत हजारौँ प्रदर्शनकारीहरूले शिक्षामन्त्रीको राजीनामापछि नाचगान, नाराबाजी तथा मिठाई बाँडेर खुसीयाली मनाएका छन् । आन्दोलनका संस्थापक अभिजीत दिप्के ले आन्दोलन सफल भएको दाबी गर्दै यसलाई युवाहरूको ऐतिहासिक विजय भएको बताएका छन् ।
शिक्षामन्त्री धर्मेन्द्र प्रधानले सामाजिक सञ्जाल एक्स (X) मार्फत राजीनामाको घोषणा गर्दै पछिल्ला घटनाप्रति आफू दुःखी भएको र विद्यार्थीहरूको भविष्यलाई ध्यानमा राखेर प्रधानमन्त्रीसमक्ष राजीनामा बुझाएको बताएका छन् ।
‘कक्रोच जनता पार्टी (सीजेपी)’ कुनै औपचारिक राजनीतिक दल नभई कृत्रिम बुद्धिमत्ता (एआई) बाट सिर्जना गरिएको ‘कक्रोच’ प्रतीकमार्फत सुरु भएको व्यङ्ग्यात्मक अभियानका रूपमा परिचित छ । आन्दोलनले भारतको शिक्षा प्रणालीमा सुधार, परीक्षा प्रश्नपत्र चुहावट रोक्न कडा कानुन ल्याउनुपर्ने र शिक्षामन्त्रीको राजीनामा हुनुपर्ने माग राख्दै व्यापक जनसमर्थन जुटाएको थियो ।
शिक्षाविद् तथा अभियन्ता सोनम वाङचुक ले आन्दोलनलाई समर्थन गर्दै आमरण अनशन बसेपछि आन्दोलन थप सशक्त बनेको थियो । त्यसपछि प्रधानमन्त्री नरेन्द्र मोदी ले परीक्षा प्रश्नपत्र चुहावटमा संलग्नमाथि कडा कारबाही गर्न द्रुत अदालत गठन गर्ने तथा नयाँ कानुन ल्याउने घोषणा गरेका थिए ।
यद्यपि आन्दोलनका संस्थापक दिप्केले शिक्षामन्त्रीको राजीनामामात्रै अन्तिम लक्ष्य नभएको स्पष्ट पार्दै शिक्षा क्षेत्रमा व्यापक सुधारका लागि दबाब जारी रहने बताएका छन् ।
